Kinyarwanda
English
Ku gicamunsi cyo ku wa kabiri tariki 19 z’uku kwezi, mu kagari ka Ntoma, Umurenge wa Musheri, ho mu karere ka Nyagatare habereye igikorwa cyo kumena amakarito asaga 300 y’inzoga z’amoko atandukanye zitemewe mu Rwanda zafatiwe mu mirenge ya Rwempasha na Musheri mu mezi abiri ashize; abakitabiriye bakangurirwa kwirinda kwishora mu biyobyabwenge.
Inzoga zamenwe zigizwe n’amakarito 200 ya Zebra Gin, amakarito 105 ya Speranza, amakarito 10 ya African Gin, amakarito 10 ya Chase Waragi, na litiro 60 za Kanyanga.
Kanyanga ifatwa nk’Ikiyobyabwenge mu Rwanda nk’uko biteganywa n’Iteka rya Minisitiri w’Ubuzima Nº 20/35 ryo ku wa 09/6/2015 rigena ibinyobwa bitemewe n'ibindi bintu bicungwa kandi bifatwa nk’ibiyobyabwenge n'urusobe rw'imiti ikoreshwa nka byo.
Ibindi bifatwa nk’Ikiyobyabwenge; nk’uko iri Teka ribiteganya harimo Urumogi, Mayirungi, Chief Warage na Suzie. Iri Teka rivuga kandi ko guhumeka Kole na Lisansi na byo bifatwa nk’Ibiyobyabwenge.
Mu butumwa yagejeje ku bitabiriye iki gikorwa; Umuyobozi w’Intara y’Iburasirazuba, Fred Mufukukye yababwiye ati,"Kunywa izi nzoga; kimwe n’ibindi biyobyabwenge bigira ingaruka mbi zimimo kuba bigabanya ubushobozi bwo gutekereza ndetse n’ubw’umubiri; ku buryo umuntu ananirwa gukora ngo yiteze imbere ".
Yagize ati," Ubwanyu muri abahamya ko nta nyungu na mba iri mu gucuruza no kunywa inzoga nk’izi zibuzanyijwe mu gihugu. Muragirwa inama yo gucuruza; kandi mukanywa ibyemewe n’amategeko; kandi bidafite ingaruka ku buzima bw’ababinywa."
Umuyobozi wa Polisi muri iyi Ntara , Assistant Commissioner of Police (ACP) Bosco Rangira yavuze ko imikoranire myiza ya Polisi n’abaturage ndetse n’izindi nzego binyuze mu guhanahana amakuru ku gihe ari byo byatumye izi nzoga zifatwa.
Yasabye buri wese wari aho iki gikorwa cyabereye kwirinda ibiyobyabwenge by’ubwoko bwose agira ati,"Abinjiza ibiyobyabwenge mu gihugu, ababicuruza, n’ababikoresha; bamwe ni abavandimwe banyu, abandi ni inshuti n’abaturanyi banyu. Umuntu uhishira ababyishoramo amenye ko azagerwaho n’ingaruka z’ibikorwa byabo birimo gukubita no gukomeretsa, gufata ku ngufu n’ihohotera rishingiye ku gitsina. Birakwiye ko buri wese agira uruhare mu kurwanya iyinjizwa ryabyo mu gihugu, icuruzwa; ndetse n’inyobwa ryabyo atanga amakuru ajyanye n’ababikora."
ACP Rangira yabwiye abatuye Akagari ka Ntoma ko gutangira amakuru ku gihe ari ingenzi mu gukumira no kurwanya ibyaha; aha akaba yaragize ati," Iyo inzego zibishinzwe zimenya ko hari abantu bafite imigambi yo gukora ibikorwa binyuranyije n’amategeko byahungabanya umutekano, zigafatanya kubikumira; kandi iyo byabaye, zifatanya gushaka no gufata ababikoze."
Yabwiye urubyiruko rwari aho ko ari amaboko y’Igihugu n’imbaraga zacyo; hanyuma arusaba kwirinda kwishora mu biyobyabwenge ndetse n’ikindi cyose gishobora kwangiza ahazaza harwo.
Polisi y’u Rwanda ifatanya n’izindi nzego mu gukangurira Abaturarwanda kwirinda ibiyobyabwenge. Mu bafatanyabikorwa bayo harimo inzego za Leta nka Minisiteri y’Ubutabera, iy’Ubutegetsi bw’Igihugu, iy’Urubyiruko, iy’Ubuzima n’Ubushinjacyaha Bukuru. Abandi, barimo Urubyiruko rw’Abakorerabushake mu gukumira ibyaha (Rwandan Youth Volunteers in Community Policing), Abambasaderi mu gukumira ibyaha barimo Abahanzi, Abanyabugeni, Abanyeshuri, n’abatwara abagenzi mu modoka, kuri moto n’amagare.
