POLISI Y'U RWANDA

Abagize Komite z’abaturage zo kwicungira umutekano (CPCs) bagira uruhare runini mu gufasha inzego z’umutekano gukumira ibyaha bitandukanye. Ni muri urwo rwego mu mpera z’icyumweru dusoje bahawe amahugurwa na Polisi hagamijwe ku bongerara ubumenyi kugirango barusheho gukumira ibyaha mu mirenge itandukanye batuyemo.

Abahuguwe n’abo mu mirenge ya Rwempasha , Katabagemu na ri bose uko ari 131 bakaba barasabwe guhora bazirikana inshingano zabo mu rwego rwo gushobora gukumira ibyaha aho batuye.

Assistant Inspector of Police(AIP) Vincent Gatware ushinzwe guhuza ibikorwa bya Polisi n’abaturage mu karere ka Nyagatare, yibukije ba CPCs uruhare rwabo mu kwicungira  umutekano bakumira ibyaha byawuhungabanya.

Yagize ati” Murabize ko umutekano ari wo shingiro rya byose. Uruhare rwanyu mu kuwuharanira rurakenewe,muba inyangamugayo, mwuzuza inshingano zanyu zirimo gutangira amakuru ku gihe mufatanya n’abaturage n’inzego z’umutekano mu kurwanya ibyaha”.

AIP Gatware yabwiye ba CPCs ko ibiyobyabwenge biri muri bimwe mu biza ku isonga mu guteza umutekano muke, abasaba ko nk’abantu babisobanukiwe bazi ingaruka bigira, bajya bakangurira abaturage kubyirinda no guha Polisi amakuru y’ababinywa, ababitunda n’ababicuruza.

Yagize ati” ibiyobyabwenge nk’urumogi na Kanyanga, uretse kuba ubwabyo bihanwa n’amategeko, binatuma abantu bakora ibindi byaha nko gukubita no gukomeretsa, ubujura, ihohoterwa rishingiye ku gitsina, gufata ku ngufu, no gusambanya abana, turabasaba kongera imbaraga mu kubirwanya”.

Yanababwiye kandi ko bidindiza iterambere ry’ubikoresha n’iry’igihugu muri rusange, aho yabahaye urugero rwa bimwe mu biyobyabwenge byamenwe mu murenge wa Mimuli ubwo bari muri ayo mahugurwa bifite agaciro ka 1,652,650frw abasaba ko kubirwanya bikwiye kuba ibya buri wese.

Yanabasabye kandi kurwanya ihohoterwa rishingiye ku gitsina n’irikorerwa abana nko kubakoresha imirimo ivunanye, kubavana mu ishuri n’ibindi.

Yasabye abitabitriye amahugurwa gukaza amarondo kandi bagatanga serivisi nziza aho bakorera mu mirenge, ndetse no kumenya ahantu hose hakorerwa ibyaha, hagamijwe kubikumira no kubirwanya.

Umunyamabanga nshingwabikorwa w’umurenge wa Mimuli Bandora Emmanuel yashimiye ba CPCs uruhare rwabo mu kurwanya abafite ingeso mbi mu midugudu batuyemo, abasaba ko bakomeza kugira umurava wo gukumira ibyaha bitandukanye.

Komite z’abaturage zo kwicungira umutekano (CPCs) zashyizweho mu mwaka 2007 aho abazigize ari abaturage b’ inyangamugayo  batorwa na bagenzi babo bagakorera kurwego rw’akagari n’umurenge  aho bakusanya bakanatanga amakuru afasha mugukumira no kurwanya ibyaha.