POLISI Y'U RWANDA

Abafatanyabikorwa ba Polisi y’u Rwanda mu kurwanya no gukumira ibyaha mu karere ka Nyagatare,ku itariki ya 15 Nzeri 2015 bagiranye ibiganiro n’itsinda ryari riyobowe na Senior Superintendent of Police (SSP) Teddy Ruyenzi ,ushinzwe inyigisho n’amahugurwa mu Ishami rya Polisi y’u Rwanda rishinzwe imikoranire hagati ya Polisi y’u Rwanda n’abaturage hagamijwe kurwanya no gukumira ibyaha, maze biyemeza kongera imbaraga mubyo bashinzwe kugira ngo bakomeze kugira uruhare mu kubungabunga umutekano.

Abafatanyabikorwa bagiranye ibiganiro n’iri tsinda barimo abagize Komite zo kwicungira umutekano, abanyeshuri bibumbiye mu matsinda agamije kurwanya no gukumira ibyaha, n’abahoze banywa, bacuruza ,banakwirakwiza ibiyobyabwenge.

SSP Ruyenzi n’abari hamwe nawe aribo Superintendent of Police (SP) Pélagie Dusabe na Macumu Emmanuel, waturutse mu Ishami ry’Umuryango w’Abibumbye rishinzwe gahunda z’iterambere mu Rwanda, babanje gusuzumira hamwe n’aba bagize ibi byiciro imikorere n’imikoranire byabo n’izindi nzego hagamijwe kurushaho kurwanya no gukumira ibyaha aho bari hose, maze bemeranya ko uruhare rw’ibi byiciro mu kubumbatira umutekano rugaragara ariko ko hakenewe kongerwa imbaraga mu gukangurira abaturage muri rusange ko kurwanya no gukumira ikintu cyose gishobora guteza umutekano muke biri nyungu za buri wese.

Abagiranye ibiganiro n’iri tsinda ni abanyeshuri bibumbiye mu itsinda rirwanya ndetse rigakumira ibyaha bo mu rwunge rw’amashuri rwa Nyagatare, abagize Ishyirahamwe ry’Inshuti z’Umurimo, aba bakaba ari abahoze banywa, batunda ndetse banacuruza ibiyobyabwenge, n’abagize Komite zo kwicungira umutekano bo mu kagari ka Nshuli, ko mu murenge wa Nyagatare.

Ubutumwa abagize iri tsinda  bahaye abagize ibi byiciro bwagarutse ku kubashimira uruhare bagira mu gusigasira umutekano no kubasaba kongera imbaraga mu bikorwa bigamije gukangurira abaturage muri rusange kwirinda no kurwanya ikintu cyose gishobora kuwuhungabanya.

Abo banyeshuri biyemeje kuvugurura imikorere y’ihuriro ryabo ryo kurwanya no gukumira ibyaha kandi basezeranya abagize iryo tsinda ko ibikorwa by’ubukangurambaga by’itsinda ryabo batazajya babikora ku ishuri gusa ahubwo ko bazajya banabikora iwabo mu gihe bari mu biruhuko ndetse n’igihe bazaba barangije amashuri.

Abo banywaga, bacuruzaga kandi bagakwirakwiza ibiyobyabwenge  babwiye iri tsinda ko nyuma yo kubireka bafunguye konti yo kwizigamira kugira ngo ayo mafaranga ajye abunganira mu iterambere ryabo, bakaba barabwiye iri tsinda ko bamaze kuzigama amafaranga y’u Rwanda angana n’ibihumbi 400, kandi baryizeza ko bazakomeza gusobanurira abandi ububi bw’ibiyobyabwenge no kubakangurira kubireka no kubirwanya.

Iri tsinda ryeretswe litiro 1200 za Kanyanga, ibiro 700 by’urumogi ,n’amakarito 45 y’imiti itandukanye ya magendu kandi  itujuje ubuziranenge  byafashwe kuva mu ntangiro z’ukwezi gushize, bikaba kandi bibitse kuri sitasiyo ya Polisi y’u Rwanda ya Nyagatare mu gihe hategurwa iyangizwa ryabyo.

Abagize iri tsinda basobanuriwe ko  ifatwa ryabyo ryatewe n’imikoranire myiza hagati ya Polisi y’u Rwanda n’abafatanyabikorwa bayo muri aka karere.

SSP Ruyenzi yibukije abagize ibi byiciro ko  uwanyoye ibiyobyabwenge nta bwenge aba afite ari nayo mpamvu akora cyangwa agira uruhare mu gukora ibyaha birimo ubujura, gukubita no gukomeretsa, urugomo, gufata ku ngufu no gusambanya abana, bityo abasaba kongera imbagara mu bukangurambaga bwo kurwanya inyobwa, itundwa n’icuruzwa ryabyo ndetse n’ibindi byaha muri rusange.

Umwe muri abo bagize Komite zo kwicungira umutekano witwa Kazatsinda Désire yashimiye iri tsinda ku nama ryabagiriye agira ati:"Baduhwituye, tugiye kongera imbaraga mubyo dushinzwe. Mu gihe cyashize, ntitwasinziraga kubera ituze rike twatezwaga n’abanyoye urumogi  n’abasinze  Kanyanga n’izindi nzoga zitemewe ziba mu masashi. Ubu, byaragabanyutse ku buryo bugaragara, ibyo bikaba byaratewe n’ubufatanye kandi tuzakomeza gukorana neza na Polisi y’u Rwanda ndetse n’izindi nzego kugira ngo tubice burundu."

Umuyobozi wa ririya tsinda ry’abaretse ibiyobyabwenge ariwe Muhoza Jean Marie Vianney yagize ati:" By’umwihariko, igihe namaze nywa ibiyobyabwenge ntacyo nabyungukiyemo uretse kunyangiririza ubuzima no guhora nihisha inzego z’umutekano n’iz’ubuyobozi bw’ibanze.  Mu gihe cy’amezi atanu tumaze tubiretse , twagize uruhare mu kubirwanya dukangurira abantu ububi bwabyo kandi tuzakomeza ubwo bukangurambaga."

Yakanguriye abantu mu ngeri zose kutanywa,kudatunda no kudacuruza ibiyobyabwenge no kujya batanga amakuru ku gihe y’ababikora.