Kuwa 16 Kanama ,urubyiruko rw’abahungu n’abakobwa ruri kugororerwa mu kigo ngororamuco giherereye mu karere ka Ngororero mu  murenge wa Kabaya rwasuwe na Polisi y’u Rwanda ikorera muri aka karere ndetse n’umuryango witwa Tubibe amahoro.

Urubyiruko rugizwe n’abahungu n’abakobwa bagera kuri 52 baturutse mu mirenge itandukanye igize ako karere,rukaba rwarafatiwe mu bikorwa byo kunywa no gukoresha ibiyobyabwenge ndetse n'izindi ngeso mbi.

 Mu kiganiro cyatanzwe n’Umuyobozi wa Polisi ushinzwe guhuza ibikorwa bya Polisi n’izindi nzego n’abaturage hagamijwe kurwanya no gukumira ibyaha (DCLO) , Assistant Inspector of Police(AIP) Etienne Karengera, yagaragarije uru rubyiruko ububi n’ingaruka z’ibiyobyabwenge.

Yagize ati”Nk’uko izina ryabyo riri uko wabikoresha kose biragenda bikayobya ubwenge,imitekerereze n’imigirire bigahinduka. Uwabinyoye kubera guta ubwenge bimushora mu ngeso mbi nko gufata ku ngufu, gukubita no gukomeretsa, guhohotera,ubujura n’ibindi”.

Yakomeje ababwira  ko ibiyobyabwenge bifite ingaruka nyishi zitandukanye harimo ibihano n’igifungo kubinywa n’ubikwirakwiza, gucikiriza amashuri ndetse n’amakimbirane mu miryango.

AIP Karengera yanabasabye uru rubyiruko ko nirusubira mu miryango yarwo rwazagira uruhare mu kurwanya ibiyobyabwenge  buri muntu aba ijisho rya mugenzi we,bagatangira amakuru ku gihe .

Harerimana Norbert , Umuyobozi w’Umuryango Tubibe amahoro,  Umuryango ushinzwe kurengera abaturage kubijyanye n’amategeko no kurwanya ihohoterwa rikorerwa mu ngo, yasabye uru rubyiruko kureka ibiyobyabwenge.

Yagize ati” Ibiyobyabwenge nta kindi bigeza ku muntu usibye kwangiza ubuzima bwe no gufungwa kuko hari amategeko ahana ubikoresha, niyompamvu mwabireka ahubwo mukaba ku isonga yababirwanya”.

Umwe mu bahagarariye uru rubyiruko ruri kugororerwa i Kabaya, Dusabeyezu Alfred yavuze ko izi nama bahawe zizagira ingaruka nziza mu guhindura imyifatire n’imyitwarire yabo.Yanavuze  zizabafasha kugabanya ibyaha by’urugomo,ubujura,inda zitateguwe n’ibindi byaha bikururwa no gukoresha ibiyobyabwenge.

Biyemeje gufatanya na Polisi ndetse n’abayobozi ku nzego z’ibanze mu kurwanya no gukumira ibyaha.