POLISI Y'U RWANDA

Abayobozi b’ibigo by’amashuri yisumbuye na bamwe mu barezi barenga 150 bo mu karere ka Ngororero, kuri uyu wa kane tariki ya 7 Kanama baganirijwe ku ndangagaciro nyarwanda nk’imwe mu ntwaro yo kurwanya ibiyobyabwenge mu bigo bakoreramo.

Ibi biganiro bikaba byaraberereye mu kagari ka Rususa umurenge wa Ngororero biangizwa ku mugaragaro n’umuyobozi w’akarere ka Ngororero Ruboneka Gedéon

Umupolisi ushinzwe guhuza ibikorwa bya Polisi n’iby’abaturage (DCLO) mu karere ka Ngororero Inspector of Police (IP), Adrien Rutagengwa, yabukije abari  muri ibi biganiro ko Umunyarwanda mwiza arangwa n’indangagaciro zirimo ubunyangamugayo no gukunda igihugu.

IP Rutagengwa yababwiye ibyaha abanyeshuri bakunda kugaragaramo bikabagiraho ingaruka nyinshi.

Aha yatanze urugero rw’abishora mu biyobyabwenge bikabaviramo guta amashuri abakobwa bakaba bashobora no gutwara inda zitateganyijwe.

Yabasabye kwigisha abanyeshuri bashinzwe kurera indangagaciro nyarwanda kugirango babategure kuzavamo abanyarwanda babereye igihugu.

Umuyobozi w’akarere ka Ngororero Ruboneza Gedeon yasabye aba bayobozi b’ibigo by’amashuri n’abarezi gukurikirana ibiganiro neza, bagakuramo ubumenyi buhagije ku ndangagaciro nyarwanda, abasaba ko ibyo bakuramo bazabigeza kuri bagenzi babo bataje muri aya mahugurwa ndetse n’abaturanyi babo.

Nyuma y’ibyo biganiro, umuyobozi w’ishuri ryisumbuye “Ibuka” riri mu murenge wa Kabaya Mvuyekure Cyprien, yashimye Polisi y’u Rwanda kubera amasomo yabahaye, anavuga ko we na bagenzi be bamenye ko bagomba gufata iya mbere gukunda no kwitangira igihugu.

Yasoje asaba ko aya masomo yanagezwa kuri bagenzi be bo mu bindi bigo ku bnyeshuri ndetse no ku banyarwanda bose.