POLISI Y'U RWANDA

Abayobozi bagize Komite z’abaturage zo kwicungira umutekano (CPCs) barenga 80 bo mu murenge wa Ngororero mu Karere ka Ngororero  bagiranye ibiganiro na Polisi ikorera muri aka karere  basabwa guhora batekereza ku nshingano zabo, barushaho  gukorana n’izindi nzego batangira amakuru ku gihe kucyo aricyo cyose gishobora guhungabanya umutekano mu midudugudu batuyemo.

Ibi biganiro byatanzwe ku itariki 18 Nyakanga, bibera mu murenge wa Ngororero biyobowe na Muvunanyambo Faustin wari uhagarariye umunyamabanga nshingwabikorwa w’umurenge wa Ngororero ari kumwe na Assistant Inspector of Police (AIP) Etienne Karengera  ushinzwe guhuza ibikorwa bya Polisi n’abaturage hagamijwe gukumira no kurwanya ibyaha (DCLO) muri aka karere.

Muvunanyambo yibukije abagize izi Komite z’abaturage zo kwicungira umutekano ko bakwiye guhora basigasira icyizere bafitiwe n’abaturage buzuza inshingano bahawe.

Yagize ati:’’ Muri abavuga rikumvikana hirya no hino mu midugudu mutuyemo, mukwiye guhora muharanira ko abaturage bahora babibonamo, mugira uruhare mu kunga imiryango ibanye mu makimbirane, mwibutsa abaturage kwicungira umutekano binyuze mu gukora amarondo.’’

Uyu muyobozi yabibukije ko bakwiye guhora bibutsa abaturage kwitabira gahunda za Leta zitandukanye zigamije iterambere n’imibereho myiza.

Yagize ati: “Gukorera mu makoperative, gukora ubuhinzi bugamije gusagurira amasoko, kwitabira gutanga umusanzu w’ubwisungane mu kwivuza, ni zimwe muri gahunda za Leta zigamije imibereho myiza y’abaturage no kwihaza mu biribwa, mukwiye kudufasha kugeza izi gahunda hirya no hino aho mutuye.’’

AIP Karengera yashimiye abagize komite zo kwicungira umutekano mu midugudu batuyemo uruhare bakomeje kugira, bafasha Polisi gukumira ibyaha bitandukanye.

Yagize ati:’’Ubukangurambaga bwanyu mu gukangurira abaturage kutijandika mu byaha byagabanyije umubare w’ibyaha birimo, ihohoterwa, amakimbirane yo mu muryango. Gutangira amakuru ku gihe nabyo byafashije Polisi gutahura abanyabyaha batandukanye, barimo abacuruza ibiyobyabwenge birimo urumogi ndetse n’inzoga z’inkorano.’’

AIP Karengera yanavuze ariko ko n’ubwo ibyaha bigenda bigabanuka inzira ikiri ndende, asaba buri wese guhora azirikana inshingano ze.

Yaravuze ati:’’ Mugomba guhora mufite amakuru y’uko umutekano uhagaze iwanyu mu midugudu, mu gihe mugize icyo mumenya gishobora kuwuhungabanya, mukwiye kwihutira gutanga amakuru kugirango bikumirwe bitaraba, izo nizo nshingano z’ibanze buri wese akwiye guhora azirikana.’’

Komite z’abaturage zo kwicungira umutekano (CPCs) zashyizweho mu mwaka wa 2007, zikaba zigizwe n’ abaturage b’ inyangamugayo  batorwa na bagenzi babo bagakorera ku rwego rw’akagari n’umurenge  aho bakusanya bakanatanga amakuru afasha mu gukumira no kurwanya ibyaha.