POLISI Y'U RWANDA

Polisi y’ u Rwanda ikorera mu karere ka Ngoma yagiranye ibiganiro n’abagize ihuriro ry’urubyiruko rw’abakorerabushake mu gukumira no kurwanya ibyaha, bagamije kubahugura uko bakomeza gukorana neza n’inzego z’umutekano mu gukumira no kurwanya ibyaha.

Ibi biganiro byabaye kuwa 19 Mata 2018 mu karere ka Ngoma mu murenge wa Karembo, byatanzwe na Inspector of Police (IP) Charles Kabanda ari kumwe na Rubwiriza Jean D’amour, umunyamabanga nshingwabikorwa w’umurenge wa Karembo.

IP Charles Kabanda uyobora Sitasiyo ya Polisi ya Karembo yashimiye abagize iri huriro uruhare n’ubufatanye badahwema kugaragariza inzego z’umutekano mu kwicungira umutekano.

Yagize ati:’’ kuva iri huriro ryashingwa, ntimwigeze mujya kure y’inzego z’umutekano by’umwihariko Polisi yanyu. Twishimira uruhare rwanyu mu gukumira ibyaha bitandukanye cyane cyane ikoreshwa ry’ibiyobyabwenge mu rubyiruko, ndetse n’ibikorwa by’iterambere bitandukanye mudahwema gukora hirya no hino mu gihugu.’’

IP Kabanda yakomeje asaba abagize iri huriro ry’urubyiruko rw’abakorera bushake mu gukumira ibyaha gukomeza gufasha mu guhindura imyumvire y’abagikora ibikorwa bihungabanya umutekano.

Yagize ati:’’Hari bamwe mu rubyiruko bakigaragara mu bikorwa byo kwishora mu  biyobyabwenge ndetse n’inzoga z’inkorano, ibi byose biri mu biteza ibyaha bitandukanye bikanahungabanya umutekano. Uruhare rwanyu rurakenewe mu guca uyu muco mubi.’’

IP Kabanda yasoje asaba abagize iri huriro kujya batangira amakuru ku gihe ku nzego z’umutekano mu gihe hari ibikorwa bishobora guhungabanya umutekano.

Yagize ati:’’Hirya no  hino aho mukorera imirimo itandukanye hari abakora ibikorwa bihungabanya umutekano birimo icuruzwa ry’ibiyobyabwenge, ihohotera rikorerwa abana, amakimbirane yo mu ngo n’ibindi.  Mu gihe mubonye amakuru nk’aya mukwiye guhita mubimenyesha inzego z’umutekano tugakumira ibyaha bitaraba.’’

Rubwiriza Jean D’amour, umunyamabanga nshingwabikorwa w’umurenge wa Karembo yashimiye uru rubyiruko rugize ihuriro ry’abakoranabushake mu gukumira no kurwanya ibyaha, uruhare bagira mu gukumira ibyaha bitandukanye ndetse n’ibikorwa by’iterambere birimo ubukangurambaga mu gutanga ubwisungane mu kwivuza, kuremera abatishoboye n’ibindi. Yabasabye kuzashyira mu bikorwa inama nziza bagiriwe na polisi y’u Rwanda.

Abagera 150 nibo  bahawe ibi biganiro aho bemeza ko bagiye kurushako kwegera urubyiruko rukigaragara mu ngeso mbi z’ibiyobyabwenge n’ibindi byaha.