Kinyarwanda
English
Ku wa kane tariki 12 Nyakanga uyu mwaka, Polisi yagiranye ikiganiro n’abatwara abagenzi mu modoka mu buryo bwa rusange hamwe n’abagenzi bari bateze imodoka aho zitegerwa mu Mujyi wa Musanze (mu murenge wa Muhoza) ku ruhare rwabo mu gukumira impanuka mu muhanda.
Ibi babisabwe na Senior Superintendent of Police (SSP), Jean Luis Rurangwa; akaba ashinzwe ibikorwa bya Polisi mu Ntara y’Amajyaruguru byerekeranye no kugarura ituze muri rubanda.
SSP Rurangwa yabwiye aba batwara abagenzi mu modoka mu buryo bwa rusange ko gutwara imodoka ku muvuduko urenze uwagenwe n’amategeko, gukoresha telefone uyitwaye, guca ku kindi kinyabiziga cyangwa ibindi binyabiziga mu buryo budakurikije amategeko y’umuhanda, kurenza umubare w’abagenzi wagenwe n’uwakoze imodoka (Ibyitwa gutendeka), kutubahiriza Ibyapa biyobora cyangwa Ibimenyetso bimurika byerekana uko bagenda mu muhanda; ari bimwe mu bitera abatwara imodoka gukora cyangwa guteza impanuka.
Yababwiye ko bamwe mu batwara abagenzi mu modoka mu buryo bwa rusange bajya bangiza Utugabanyamuvuduko kugira ngo babone uko batwara imodoka ku muvuduko mwinshi; bagamije kugira ngo bakore inshuro nyinshi ; abasaba kubyirinda.
SSP Rurangwa yabasabye kandi kwirinda kuvanga imitwaro n’abagenzi, gutwara imodoka basinze cyangwa babaniwe; kandi ko bagomba kubahiriza uburenganzira bw’abandi bakoresha inzira nyabagendwa barimo abanyamaguru n’abatwara ibindi binyabiziga bito.
Yabibukije ko imodoka batwaramo abagenzi zigomba kuba zifite ubuziranenge kugira ngo hirindwe ibyago by’impanuka; bityo ko zigomba gukorerwa isuzuma ry’ubuziranenge mu Kigo cya Polisi y’u Rwanda gishinzwe kugenzura ubuziranenge bw’imodoka.
Yasabye abo bashoferi gucika ku muco mubi uranga bamwe mu batwara ibinyabiziga wo kuburirana ko nta mupolisi uri mu cyerekezo buri wese arimo kwerekezamo; cyangwa ko ari mo.
Yababwiye ati, "Bamwe mu bakwirakwiza ibiyobyabwenge babikura mu gace runaka babijyana ahandi bagenda mu modoka. Murasabwa gushishoza kugira ngo mutabafasha kubigeraho. Igihe cyose mubonanye umugenzi ibiyobyabwenge, magendu ;cyangwa ibindi bintu bitemewe n’amategeko mugomba kubimenyesha vuba Polisi."
SSP Rurangwa yasabye abagenzi bari aho kujya batanga amakuru ajyanye n’Abashoferi bica amategeko y’umuhanda; ababwira ko guhishira abayica ari ugushyira ubuzima bwabo mu kaga; ndetse n’ubwandi bakoresha inzira nyabagendwa.
