Kinyarwanda
English
Polisi y’u Rwanda ikorera mu turere twa Musanze na Kirehe, kuwa gatatu tariki ya 28 Gashyantare yatanze amahugurwa ku bagize komite zo kwicungira umutekano (Community Policing Commetees-CPC’s) bakangurirwa gusobanurira abaturage ko bafite uruhare runini mu mutekano n’iterambere ry’igihugu.
Mu karere ka Musanze abahuguwe ni abo mu murenge wa Nkotsi naho muri Kirehe hahuguwe abo mu murenge wa Gahara, bose hamwe barenga 600.
Polisi y’u Rwanda ikaba yifashisha izi komite nk’uburyo bwo gushishikariza abaturage kwicungira umutekano no gutanga amakuru y’abanyabyaha.
Aganira na CPC’s bo mu murenge wa Nkotsi muri Musanze, Chief Inspector of Police (CIP) Viateur Ntiyamira, ushinzwe guhuza ibikorwa bya Polisi n’iby’abaturage muri ako karere, yabasabye gukangurira abaturage kwirinda ibiyobyabwenge n’amakimbirane yo mu ngo.
Yaravuze ati:”Amakimbirane ayo ariyo yose agira ingaruka ku muryango. Mukangurire abaturage kuyirinda kuko nibayirinda bazaba birinze bo ubwabo, imiryango yabo ndetse n’abaturanyi babo.”
Mu kiganiro Inspector of Police (IP) Gahigi Harerimana we yabwiye CPC’s bo muri Gahara mu karere ka Kirehe, yabasabye gukangurira ababyeyi kwigisha abana indangagaciro nyarwanda kugirango bakurane umuco wo kwirinda ibyaha.
Aha yaravuze ati:”Mukangurire ababyeyi kwigisha abana babo gukemura amakimbirane badakoresheje imbaraga, kandi namwe mubabere urugero. Niba hari ikibazo mufitanye na bagenzi banyu mugikemure mu mahoro kugirango abana banyu babarebereho.”
Yabasabye kandi kuba maso bakareba abanywa n’abinjiza ibiyobyabwenge mu midugudu yabo, ababwira ko kurwanya ibiyobyabwenge ari imwe mu ntego za Polisi y’u Rwanda, bityo ko n’abaturage iyi ntego bakwiye kuyigira iyabo.
