Kinyarwanda
English
Kuri uyu wa 9 Ukwakira 2017 Polisi y’u Rwanada n’abafatanyabikorwa bayo baganirije abana b’abakobwa bo mu mujyi wa Musanze bakora n’abakoraga uburaya. Ibi biganiro byarangiye abari bagikora uburaya biyemeje kubureka kubera ubuhamya baherewe muri iyo nama .
Ni ibiganiro Polisi y’u Rwanda yatanze ku bufatanye n’abafatanyabikorwa bayo aribo Great lakes Initiative for Human Rights Delopment(IHRD) ndetse n’ubuyobozi bw’akarere ka Musanze.
Muri ibi biganiro Polisi yari ihagarariwe n’ushinzwe guhuza ibikorwa byayo n’izindi nzego(DCLO) IP Viateur Ntiyamira, Uwamariya Marie Claire, umuyobozi w’akarere wungirije ushinzwe imibereho myiza y’abaturage ndetse n’Umurisa Husna Vestine, wari uhagarariye IHRD.
Mu kiganiro yatanze, IP Ntiyamira yibanze ku gusobanurira urubyiruko rukora n’urwahoze rukora uburaya mu mujyi wa Musanze ububi bw’uburaya bukunze kugaragara mu mujyi wa Musanze, ibibi byo gukuramo inda, anabasobanurira ku mategeko abihana n’izindi ngaruka zirimo.
Yagize ati: Ndakeka ko mwese ntawe uyobewe ko iyo mu buraya ushobora kuhandurira indwara zitandukanye ndetse mukanatwariramo inda zitateganyijwe,turabasaba ko mwareka uburaya ahubwo mukagana amakoperative y’urubyiruko mukareba ibyo mukora bibateza imbere.
Muri ibi biganiro IP Ntiyamira yanagarutse ku ruhare rw’ababyeyi muri uru rugamba rwo kurwanya uburaya mu rubyiruko rwo mu mujyi wa Musanze, aho yabasabye ku kwita ku burere n’indangagaciro nyarwanda.
Yagize ati:”Ababyeyi turabasaba kwita ku burere bw’abana babo kuko usanga byose bipfira ku burere baba bahawe , habayeho kudohoka gukabije ku babyeyi benshi , babaye ba terera iyo. Hari abo usanga badafata umwanya ngo baganirize abana babo ngo babereke kirazira.”
Mu gusoza, yavuze uburaya butuma habaho umutekano muke aho zituye kubera ko budasigana n’ubusinzi, zicumbikira abajura n’abandi bagizi ba nabi kandi rimwe na rimwe zigakorana nabo, yavuze kandi ko n’ingaruka zabwo zizana ibibazo bitandukanye mu miryango zivukamo,amakimbirane hagati y’abavuka badahuje ba se cyane cyane mu izungura n’ibindi,…
Uwamariya Marie Claire, umuyobozi w’akarere wungirije mu karere ka Musanze ushiunzwe imibereho myiza y’abaturage yashimye ubufatanye bwa Polisi n’izindi nzego zifite aho zihuriye n’ubuzima uburyo bafashe umwanya bakaza guha ibiganiro uru rubyiruko.
Umuryango Great Lakes Initiative for Human Rights and Development wari uhagarariwe n’umuyobozi wungirije ariwe Umurisa Husna Vestine,muri ibi biganiro nawe yavuze ko umuryango wishimiye ubufatanye na Polisi y’ u Rwanda anizeza ko bazajya bakorana na Polisi umunsi ku wundi mu bikorwa bitandukanye bigamije imibereho myiza y’abanyarwanda.
Bamwe mu bavuze mu izina ry’abakoraga umwuga w’uburaya batanze ubuhamya bavuga ko umwuga w’uburaya nta kiza cyawo ko bawuhuriragamo n’ibibazo bitandukanye nko gukubitwa, kwamburwa amafaranga n’abo bita abakiliya babo.
Aba, ubu bakaba baragannye amakoperative abigisha imyuga yo kudoda no kuboha uduseke ubu bakaba bamaze kwiteza imbere.
Ubuhamya bw’aba, bukaba bwaratumye n’abari muri iyo nama bari bagikora uburaya bafata umwanzuro wo kubuvamo bagasanga bagenzi babo mu makoperative abateza imbere.
