Kinyarwanda
English
Ku wa kabiri tariki 20 Werurwe uyu mwaka mu karere ka Musanze habereye ubukangurambaga ku kwirinda kwishora mu biyobyabwenge bwakurikiwe n’igikorwa cyo kumena inzoga zitemewe mu Rwanda zafatiwe muri aka karere mu byumweru bibiri bishize ku bufatanye bwa Polisi n’izindi nzego.
Inzoga zamenwe zigizwe n’amaduzeni 533 ya Blue Sky, amaduzeni 82 ya Chase Vodka, amaduzeni 17 ya Host Waragi, amaduzeni 6 ya Kitoko, amaduzeni 3 ya Empire n’amasashi 38 y’iyitwa Beat.
Na none hamenwe inzoga zitujuje ubuziranenge zigizwe n’amacupa 639 y’iyitwa Ubwiza , amacupa 272 y’Urwunge n’amacupa 38 ya Meraneza. Usibye izi nzoga hamenwe kandi amacupa 28 y’amavuta yo kwisiga atujuje ubuziranenge yitwa Caro Light.
Igikorwa cyo kumena ibi byose cyabereye mu kagari ka Muhoza, mu murenge wa Muhoza. Kitabiriwe n’abatuye aka gace ndetse no mu nkengero yako.
Mu butumwa yagejeje ku bakitabiriye, Umuyobozi wa Polisi muri aka karere, Superintendent of Police (SP) Aphrodis Gashumba yababwiye ko gucuruza inzoga zitemewe mu Rwanda bitera igihombo kuko iyo zifashwe ziramenwa; aha akaba yaragize ati," Igikorwa cy’uyu munsi ni igihamya ko kuzishoramo amafaranga ari ukuyapfusha ubusa. Yakabaye ashorwa mu bindi byemewe n’amategeko bibyara inyungu."
Yongeyeho ko abanywa inzoga nk’izi bakora ibikorwa binyuranyije n’amategeko bihungabanya ituze n’umutekano bya rubanda nko gukubita no gukomeretsa, gufata ku ngufu n’ihohotera rishingiye ku gitsina; asaba buri wese wari aho icyo gikorwa cyabereye kugira uruhare mu kurwanya iyinjizwa ryazo mu gihugu n’icuruzwa ryazo atanga amakuru yerekeranye n’ababikora.
SP Gashumba yaburiye abazinjiza mu gihugu bazikuye muri bimwe mu bihugu bihana imbibi n’u Rwanda agira ati,"Turabagira inama yo kubireka kuko inzira bacamo tuzizi; ndetse n’amayeri bakoresha kugira ngo badafatwa turayazi. Ikindi ni uko benshi bamaze kumenya no gusobanukirwa ingaruka z’izi nzoga ku buryo abo Polisi izifatana biba byaturutse ku makuru aba yatanzwe na bamwe mu baturage ."
Mu kiganiro yagiranye n’abo baturage, Umunyamabanga Nshingwabikorwa w’Umurenge wa Muhoza, Manzi Jean Pierre yabasabye kwirinda gucuruza no kunywa inzoga zose zitemewe zaba izituruka hanze y’u Rwanda ndetse n’izengerwa mu gihugu; aha akaba yaragize ati,"Nimuzirinda muzagira ubuzima buzira umuze ; bityo mukore ibibateza imbere binateza imbere igihugu; kandi muzirinda ibyaha biterwa no kuzinywa."
Yabasabye gukora neza amarondo kugira ngo babashe gukumira itundwa ry’ibiyobyabwenge n’ibindi byaha ; kandi abakangurira gutangira ku gihe amakuru yerekeranye n’icyahungabanya umutekano kugira ngo gikumirwe.
