Kinyarwanda
English
Mu nama y’umutekano yabereye mu murenge wa Shingiro, mu karere ka Musanze yateranye mu gitondo cyo ku italiki 15 Ugushyingo, abayitabiriye basabwe gushyira hamwe imbaraga, bakicungira umutekano barwanya ibintu byose bigaragara mu murenge wabo ko biwuhungabanya.
Iyi nama yayobowe n’umuyobozi w’Intara y’Amajyaruguru, Jean Claude Musabyimana ari kumwe n’umuyobozi wa Polisi muri iyi Ntara, Assistant Commissioner of Police(ACP) Bertin Mutezintare n’abayobozi b’izindi nzego zishinzwe umutekano ku rwego rw’Intara, ikaba yari yitabiriwe n’abantu barenga 3000, barimo abayobozi b’imidugudu, abahuzabikorwa b’utugari, ab’imirenge, nyobozi na njyanama y’akarere ka Musanze, abahagarariye amadini, abahagarariye abikorera kugiti cyabo ndetse n’abandi bafatanyabikorwa b’umurenge.
Muri iyi nama, aba bayobozi baganiriye ku bibazo by’umutekano biri muri aka gace, uko amarondo akorwa, ubujura ndetse n’uko ihohoterwa rishingiye ku gitsina rihagaze muri Shingiro ndetse no kurwanya ubujura.
Aba bayobozi babwiwe ko muri rusange ibyaha bigenda bigabanuka, abaturage batuye mu murenge wa Shingiro, n’abatuye Musanze muri rusange, basabwa kugira uruhare ku mutekano w’aho batuye batabihariye inzego zishinzwe umutekano, banemeranywa ko bose bagiye gushyira hamwe imbaraga bakarwanya ubujura n’amakimbirane yo mu miryango ashingiye ku butaka, akunze kurangwa muri aka gace.
Guverineri Musabyimana yasabye abari bitabiriye inama cyane cyane abayobozi ku nzego zose, ko bashyira imbaraga mu gukemura ibibazo by’abaturage kandi abafitanye ibibazo nabo, bakihutira kubigeza mu nzego ngo bishakirwe umuti kandi buri muturage akaba ijisho rya mugenzi we, hagatangwa amakuru ku bacuruza ibiyobyabwenge nabyo byagaragajwe nk’ibifite uruhare ku mutekano muke .
Kuri iki kibazo, Guverineri Musabyimana yasabye abayobozi b’imidugudu ko kugeza mu mpera z’uyu mwaka, baba barangije gukora urutonde rw’abantu bose banywa bacuruza cyangwa abinjiza Kanyanga ku mitwe cyangwa kuri moto zizanwa muri aka gace bazivana mu bihugu duturanye.
Umuyobozi wa Polisi mu Ntara y’Amajyaruguru mu ijambo rye, yabwiye abitabiriye iyi nama ko Polisi y’u Rwanda yahagurukiye kurwanya abashaka guhungabanya umudendezo w’abanyarwanda mu buryo ubwo ari bwo bwose; haba kunywa no gucuruza ibiyobyabwenge, ubujura, gukubita no gukomeretsa ndetse n’ubwicanyi bwa hato na haton’ibindi byaha.
ACP Mutezintare yasabye abayobozi b’inzego z’ibanze n’abaturage gukomeza gufatanya na Polisi bagatanga amakuru y’aho bazi abakora ibyaha bitandukanye cyangwa abafite imigambi mibi, bagakaza amarondo , bakirinda kunywa ibiyobyabwenge kuko biri mu biteza umutekano mucye.
