Kinyarwanda
English
Kuri uyu wa Mbere tariki ya 6 Nzeri ku kicaro cya Polisi mu Ntara y'Amajyaguru herekaniwe abantu 49 bafatiwe mu bikorwa bitandukanye bya Polisi byabereye mu Karere ka Musanze barenze ku mabwiriza yo kurwanya icyorezo cya COVID-19.
Aba bantu bagizwe ni itsinda ry'abantu 21 bafatiwe mu kabari banywa inzoga, 11 bafatiwe mu nama itegura ubukwe, 8 bafatiwe mu birori bishimiraga kwakira umuyobozi mushya mu kigo gitwara abagenzi hari n'irindi tsinda ry'abantu 9 bafashwe mu kabari nabo banywa inzoga.
Hakizimana Emmanuel, umwe mu bafashwe barenze ku mabwiriza yafatiwe mu kabari anywa inzoga yemeye ko yakoze amakosa anagira inama bagenzi be barenga ku mabwiriza.
Yagize ati "Inshuti yanjye yampamagaye kuri telefoni iri mu kabari ampamagara ambwira kumusanga mu kabari ngo dusangire icupa. Narahamusanze kugeza ubwo abapolisi badusanze mu kabari. Twarenze ku mabwiriza rwose niyo mpamvu mbisabira imbabazi."
Dukuzumuremyi Emmanuel umwe mu bakozi ba sosiyete itwara abagenzi mu buryo bwa rusange nawe yemeye amakosa bakoze asaba imbabazi.
Ati "Twateraniye mu biro dukora ibirori byo kwakira umuyobozi mushya nyamara twari turimo kurenga ku mabwiriza yo kurwanya COVID-19. Ntabwo twari tuzi ko Polisi ibimenya ikaza kudufata, nta n'uburyo bwo kwirinda kwandura cyangwa kwanduzanya twari dufite turasaba imbabazi."
Ushinzwe guhuza ibikorwa bya Polisi n'abaturage mu Ntara y'Amajyaruguru, Chief Inspector of Police (CIP) Alex Ndayisenga yavuze ko abafashwe bafatiwe mu bikorwa byo kurwanya abarenga ku mabwiriza yo kurwanya COVID-19.
Ati "Aba bantu bafashwe mu minsi 3 kuva tariki ya 3 Nzeri kugeza tariki ya 5 ubwo abapolisi bari mu bikorwa byo kurwanya abarenga ku mabwiriza yo kurwanya COVID-19. Bamwe bafatiwe mu tubari abandi bari mu birori bitubahirije amabwiriza yo kwirinda COVID-19."
CIP Ndayisenga yibukije abaturage ko muri serivisi zasubukuwe utubari tutarimo, yabibukije ko kurenga ku mabwiriza bituma icyorezo gikomeza gukwirakwira ndetse kigahitana abantu. Yakomeje asaba abantu kurwanya icyorezo ku giti cyabo badategereje ko hari abaza kubibibutsa.
Abafashwe bapimwe icyorezo cya COVID-19 ku kiguzi cyabo nyuma inzego zibishinzwe zibaca amande.
