Kinyarwanda
English
Mu cyumweru gishize, Polisi y’u Rwanda ikorera mu karere Muhanga yahuguye urubyiruko rugera kuri 350 ku kurwanya ibiyobyabwenge, kwirinda inda z’imburagihe ndetse n’uko urubyiruko rugomba kwitwara mu bihe byo kwibuka ku nshuro ya 24 Jenoside yakorewe abatutsi.
Ni amahugurwa y’umunsi umwe yabereye mu kigo cy'urubyiruko cy'akarere ka Muhanga giherereye mu mudugudu wa Kavumu akagari ka Gitarama umurenge wa Nyamabuye muri aka karere.
Aya mahugurwa yatanzwe n’umuyobozi w’iki kigo cy’urubyiruko Umuhoza Josephine ari kumwe n’umupolisi ushizwe guhuza ibikorwa bya Polisi n’abaturage (DCLO) mu karere ka Muhanga Inspector of Police (IP) Innocent Musabyimana.
Mu butumwa IP Musabyimana yatanze, yababwiye ko ibiyobyabwenge nk’urumogi, inzoga zitemewe mu Rwanda nka Kanyanga bishobora kubatera gukora ibindi byaha. Yaravuze ati:”Iyo wishoye mu biyobyabwenge bituma uta ubwenge nyine, rimwe na rimwe bigatuma wishora mu ngeso mbi zitandukanye zirimo ubusambanyi, nabwo bukakuviramo gutwara inda zitateguwe, kuva mu ishuri, kwirukanwa mu muryango kuri bamwe, ubuzererezi, no kwandura zimwe mu ndwara zandurira mu mibonano mpuzabitsina.”
IP Musabyimana yabwiye uru rubyiruko kureka ibyo byose bishobora kubononera ubuzima, ahubwo bakarushaho kwiga kugirango baziteze imbere bo ubwabo, imiryango yabo n’igihugu muri rusange.
Umuhoza ukuriye iki kigo cy’urubyiruko cya Muhanga , yashimye Polisi iko idahwema kugira inama urubyiruko ku myitwarire iboneye itandukanye igamije kurwanya no gukumira ibyaha, abwira uru rubyiruko ruri mu biruhuko ko ari rwo Rwanda rw’ejo, bityo bityo ko bagomba guca ukubiri n’ibiyobyabwenge kuko byabagiraho ingaruka nyinshi.
Asoza, Umuhoza yasabye uru rubyiruko kwitwararika muri ibi bihe byo kwibuka ku nshuro ya 24 Jenoside yakorewe Abatutsi mu 1994 igihugu cyacu kirimo, abasaba kwitabira ibiganiro bitangwa kuko bikubiyemo inyigisho nyinshi zijyanye n’amateka y’igihugu cyacu bagomba gushingiraho mu rugamba rwo gukora no guteza imbere igihugu.
