POLISI Y'U RWANDA

Amashanyarazi ari mu bintu by’ibanze byihutisha iterambere.Akoreshwa mu mirimo itandukanye irimo iyo mu ngo ndetse n’iy’ubucuruzi.

Ikosa rito cyangwa uburangare runaka mu bijyanye n’amashanyarazi , birahagije ngo byangize ibintu byinshi ndetse no hugitana abantu.Niyo mpamvu ari ngombwa gufata ingamba zo gukumira no kurwanya ikintu cyose cyateza  inkongi iyo ariyo yose.

Umuriro usobanurwa nk’uruhurirane rw’ibintu bitatu by’ingenzi bigaragazwa nk’ikibatsi gifite ubushyuhe , aribyo ikintu cyose gishobora gushya, cyaba igisukika cyangwa icyaka, ingufu ndetse n’umwuka.

Ishami rya Polisi y’u Rwanda rishinzwe  gukumira no kurwanya inkongi no gutabara abari mu kaga (Fire  and Rescue Brigade) ryashyizeho ingamba zo  kurushaho gukumira no kurwanya inkongi.

Mubyo iri shami  rikora, harimo guhugura no gutanga ubumenyi bw’ibanze ku nkongi n’ubutabazi bw’ibanze, kugenzura ibijyanye n’ubwirinzi bw’inkongi n’ibiza mu  nyubako nini n’into , gutabara byihuse mu gihe ubutabazi n’ubwirinzi byibanze bwananiranye.

Asobanura igitera  inkongi, Umuyobozi w’iri shami, Supt. of Police (SP), David Kabuye, yavuze ko inkongi ziterwa  ahanini no kwirara, ukutita ku bintu byateza inkongi, impanuka, n’ ubumenyi bucye ku nkongi .

Mu bindi, harimo gukoresha ibikoresho by’amashanyarazi bitujuje ubuziranenge, ndetse no gukoresha abantu badafite ubumenyi mu gushyira amashanyarazi mu nyubako n’ibindi bikoresho bikoresha amashanyarazi.

SP Kabuye yavuze ko inkongi ziterwa na none no kwinjiza ibikoresho byinshi bikoresha amashanyarazi mu kindi nacyo cy’amashanyarazi kidafite ubushobozi bwo kubyakira.

Yagize ati,“Inyinshi mu nkongi ziterwa na sirikwi ziterwa nazo n’uku kuremererwa.Inkongi zidindiza iterambere ”.

Avuga ku bushobozi bw’iri shami, SP Kabuye , yavuze ko ryatangiranye imodoka imwe mu mwaka w’ibihumbi bibiri (2000), rikiba ryaragiye ryiyubaka  kimwe n’izindi nzego za Polisi y’u Rwanda.

Yavuze ko ubu rifite imodoka indwi , zirimo eshanu zikoreshwa mu  mirimo yo kuzimya inkongi no gutabara abari mu kaga naho ebyiri zisigaye zikaba  zikoreshwa mu mirimo y’ubutabazi gusa.

Muri izi eshanu harimo imodoka ifite ubushobozi bwo gutabara abantu bari mu nyubako ndende aho ishobora kuzimya inkongi muri metero mirongo itanu n’enye z’uburebure ndetse no kuhatabara umuntu.

Yavuze ko izi modoka indwi Polisi ifite ubu, ziziyongeraho izindi enye mu minsi iri imbere kandi ko nizimara kuza buri ntara izagira imodoka imwe.

SP Kabuye yavuze ko iri shami ryakoze ubukangurambaga mu mashuri,amasoko n’amasantere y’ubucuruzi bwo kwirinda no kurwanya inkongi.

Yavuze ko mu mwaka wa 2013, habaye  inkongi mirongo inane n’umunane, mu gihe umwaka ushyize habaye ijana na cumi n’umunane, naho  kugeza mu kwa mbere , uyu mwaka , hakaba  harabaye icyenda, zitigeze zigira uwo zikomeretsa cyangwa ngo zihitane.

Yongeyeho ko abahura n’ibibazo byo kugwa mu myobo, guhera mu nyubako ndende, nabo batabarwa kandi bakavanwamo.

Yakanguriye abaturage gutunga ibikoresho by’ibanze byo kuzimya inkongi  bizwi ku izina rya kizimyamoto (Fire extinguisher), kumenya uko bikoreshwa no kwita ku buzima bwabyo . Aha yabakanguriye kujya babisuzumisha ku babihugukiwe buri nyuma y’amezi atandatu kugira ngo babarebere ko ari bizima.

Na none SP Kabuye yabakanguriwe kugira ubwishingizi ku nkongi z’umuriro, kutabika ibikomoka kuri peterori mu ngo, kutajya kure no kuzinya  buji, itara, itadowa mbere yo kurwama.

Yababwiye ko mu gukoresha iyi kizimyamoto bagomba guhagarara hagati ya metero eshatu n’enye, maze bagakuramo impeta yabugenewe, gufata agatiyo bakakerekeza ahari inkongi maze bagakanda ahabugenewe.

SP Kabuye yababwiye ko bagomba gukupa amashanyarazi mbere yo kuzimya inkongi bakoresheje amazi n’ifuro, kandi bakirinda kuzimisha amazi inkongi zatewe n’ibisukwa na gazi.

Ati,“Nubwo abantu bose bagirwa inama yo gutunga ibikoresho by’ibanze byo kuzimya inkongi,ku muntu utarabona ubushobozi bwo kubigura , ashobora gukoresha umucanga, amazi, ibitaka byumutse , ariko agakupa amashanyarazi mbere ya byose kandi agahungisha ibitarafatwa n’inkongi”.

Na none ati, “Ibi ntibikuraho guhamagara Polisi ku gihe kuko hari igihe umuriro warenga ubushobozi bw’abakoresha ibi bikoresho”.

Muri yo harimo imirongo utishyurwa ariyo 112, 111 n’indi yishyurwa ariyo : 0788311120, 0788311224, 0788311657 na 0788311335

SP Kabuye yasobanuye ko  inkongi zitewe  n’ibyatsi, parasitike, n’iz’ibintu bikoze mu biti, bizimishwa amazi mu gihe ibisukwa nka esansi, mazuti, godoro, peterori, n’ibindi , bizimishwa urufuro na puderi byabugenewe na gazi caribonike.

Yavuze ko gazi zaka nka methane, propane, acetyline, zizimishwa urifuro na puderi byabugenewe mu gihe ibyuma nka aliminium, uranium, zink, magnesium, lithium, hakoreshwa puderi (ifu yo mu ruganda yagenewe kuzimya ibyuma byafashwe n’inkongi).

SP Kabuye yasobanuye ko inkongi zitewe n’amashanyarazi zo zizimnywa na gazi caribonike, puderi  yakorewe mu nganda yabugenewe, ibitaka n’umucanga  byumutse.

Na none yavuze ko imiriro yatewe n’amavuta atetswe azimnywa n’umwenda wabugenewe (Fire blanket) n’umuti utose wo mu ruganda wagenewe kuzimya amavuta atekeshwa.

Mu rwego rwo gukomeza kwubaka uru rwego, abapolisi mirongi itandatu bashoje amahugurwa ku ya 30 Mutarama yo kuzimya inkongi bari bamazemo amezi atatu mu ishuri rya Polisi ry’ubumenyingiro rya Gishari.

Yakanguriye abaturage kugira za kizimyamoto mu nzu zabo ndetse n’abafite imodoka kuzishyiramo.

Na none yagiriye inama abubuka kwubahiriza igishushanyo mbonera kugira ngo byoroshye ubutabazi.

SP Kabuye yasabye abatwara ibinyabiziga kujya babererekera imodoka igiye mu gikorwa cy’ubutabazi kugira igere ahabereye inkongi ku gihe.

Itegeko rirebana n’ibihano bijyanye no kwangiza ibidukikije nomero 04/2005 ryo ku wa 8/4/2005 mu ngingo yaryo ya 109, rihanishwa kuva ku bihumbi cumi by’amafaranga y’u Rwanda kugeza ku bihumbi mirongo itanu  by’amafaranga y’u Rwanda, hakurikijwe amabwiriza yagenwe n’ubuyobozi bubifitiye ububasha,umuntu wese utwika imyanda yo mu rugo, ibiyorero, amapine, parasitike, ufite imodoka itera imyotsi, unywera itabi mu ruhame n’ahandi hantu hateranira abantu benshi.