POLISI Y'U RWANDA

Ku itariki ya 25 Gashyantare 2014 abapolisi b’u Rwanda (RWANDA FPU MALI 1) bari mu butumwa bw’Umuryango w’Abibumbye (UN) bwo kubungabunga amahoro mu gihugu cya Mali bakoze igikorwa cy’ubugiraneza cyo gufasha abanyeshuri batishoboye b’imfubyi n’abandi baburanye n’imiryango yabo kubera ibibazo by’umutekano muke n’intambara, yabereye mu Majyaruguru y’icyo gihugu mu mwaka w’2012.

Igikorwa cyo gufasha abo banyeshuri cyaranzwe no guha imfashanyo abanyeshuri 10 bo ku ishuri ryitwa “Ecole fondamentale de Boulgoundjie” ryo mu Mujyi wa Gao. Abo banyeshuri bahawe ibikoresho bitandukanye by’ishuri, amafaranga y’ishuri ndetse n’imyambaro. Ibi bikoresho byose  bikaba byari bifite agaciro kangana n’amadorali y’Amerika 600.

Uretse gutanga imfashanyo y’ibikoresho by’ishuri, abapolisi b’u Rwanda bari mu butumwa bwo kubungabunga amahoro muri Mali banafashije abaturage 41 bo mu Mujyi wa Gao mu bijyanye n’ubuvuzi, aho basuzumye ndetse baha n’imiti abo baturage ku buntu.

Ibi bikorwa byombi by’ubugiraneza bikaba byarashimwe n’ubuyobozi bw’ubutumwa bw’Umuryango w’Abibumbye bwo kubungabunga amahoro MINUSMA ndetse n’abaturage bo mu Mujyi wa Gao.