Tariki ya 28 Kanama, abaturage bo mu karere ka Kirehe mu murenge wa Mpanga mu kagari ka Nyakabungo bagize  inteko rusange y’abaturage, iyi nama ikaba akenshi iba  igamije gukemura bimwe mu bibazo biri mu miryango.

Polisi y’u Rwanda ikaba yari yatumiwe muri iyi nteko rusange y’abaturage,Umupolisi  ushizwe guhuza ibikorwa bya Polisi n’inzindi nzego mu karere hagamijwe kurwanya no gukumira ibyaha (DCLO) Inspector of Police (IP) Gahigi Harerimana niwe witabiriye iyi nteko rusange.

Mu kiganiro yatanze yagarutse ku kibazo cy’imwe mu miryango ikunze kurangwamo ihohotera,ahanini rishingiye ku mitungo n’irishingiye ku gitsina.

IP Gahigi yasabye abaturage kujya bakumira iri hohotera ritaraba kuko ringira ingaruka zikomeye ku muryango.

Yagize ati”Akenshi usanga abagabo aribo bakunze gukora iri hohotera,hari abagifite imyumvire ya  kera ko aribo bafite ububasha bwose ku mitungo yo mu rugo,abandi ntacyo bagomba kuvuga.”

Yabagaragarije ko mu muryango ari umugabo n’umugore ndetse n’abandi bagize umuryango baba bafite uburenganzira ku mitungo yo mu rugo rwabo.Yaboneyeho gukangurira imiryango itarasezerana mu buryo bwemewe n’amategeko kubikora kuko birinda ibibazo nk’ibyo byo mu miryango.

Abaturage n’abayobozi ku nzego z’imidugudu n’utugari yabasabye kujya bagira uruhare mu kumenya imiryango ifitanye ibibazo bakihutira kubikemura hakiri kare, ibyo badashoboye bikaba byashyikirizwa inkiko.

IP Gahigi yakomeje abasaba abaturage kwirinda ibiyobyabwenge kuko akenshi ari byo bitera ihohotera ryo mu miryango ndetse n’ibindi byaha.

Yagize ati”Mwirinde ibiyobyabwenge kuko nibyo ntandaro y’ibindi byaha,byamaze kugaraga ko imiryango irimo abantu banywa ibiyobyabwenge ariyo ihoramo ibibazo.Umuryango ntutera imbere,abana ntibiga,ndetse haba n’ubwo hari abafungwa.”

Muri iyi nteko rusange hakemuriwe ikibazo cy’amakimbirane mu muryango wa Ndagijimana Silas n'umugorewe  Mukamazimpaka Angelique.Ni ikibazo cyari gishingiye ku buharike,umuryango barawunze,umugabo asabwa kugaruka mu muryango.

Abaturage bishimiye uburyo Polisi yabegereye ikabafasha gukemura ibibazo ndetse ikanabagira inama.Biyemeza kujya batanga amakuru kandi bakayatangira ku gihe bagamije gukumira ibyaha bitaraba.