Kinyarwanda
English
Mu gitondo cyo kuri iki Cyumweru tariki ya 05 Mutarama 2020, abapolisi bakorera mu murenge wa Mpanga mu karere ka Kirehe bifatanyije n’abakora irondo ry’umwuga bo muri uwo murenge. Ni siporo yari yitabiriwe n'abapolisi ndetse n'abanyerondo bose hamwe bagera kuri 30. Nyuma ya siporo bagiranye ibiganiro byabafasha gukomeza kubungabunga umutekano mu murenge wabo.
Iyi siporo yari yanitabiriwe n’umuyobozi wa sitasiyo ya Polisi ikorera muri uwo murenge wa Mpanga, Chief Inspector of Police (CIP) Daniel Mbonabucya ndetse n’umupolisi ushinzwe guhuza ibikorwa bya Polisi n’abaturage n’uburere mbonera gihugu mu karere ka Kirehe, Assistant Inspector of Police (AIP) Fred Armstrong Mwesigye, ari nabo bahaye ibiganiro abo banyerondo.
CIP Mbonabucya yasabye abanyerondo gukomeza gukora akazi bashinzwe kinyamwuga badakorera ku jisho.
Yagize ati: “Umurimo umuntu akora ni wo umuhesha agaciro, kugirango rero uwo murimo ugutunge ni uko uwukora uwukunze, utiganda ntawe usiganya. Murasabwa rero gukora akazi kanyu neza muha serivisi nziza abaturage mushinzwe kurindira umutekano, mukagakora neza mutabahutaza.”
Yanabasabye kujya bakangurira abaturage kudahishira abatera abana b'abakobwa inda ahubwo bakajya bihutira gutanga amakuru igihe babimenye.
Umupolisi ushinzwe guhuza ibikorwa bya Polisi n’abaturage n’uburere mbonera gihugu mu karere ka Kirehe, AIP Mwesigye yanasabye abakora irondo ry’umwuga kurwanya ibiyobyabwenge kuko kenshi bikunze kuba intandaro y’ibindi byaha.
Yagize ati: “Murasabwa kujya mukangurira abaturage kurwanya ikoreshwa n’ikwirakwizwa ry’ibiyobyabwenge ndetse namwe ubwanyu mukajya mutanga amakuru y’ababikoresha kuko usanga aho byiganje ariho harangwa abajura, abafata abana n’abagore ku ngufu, urugomo rwo gukubita no gukomeretsa n’ibindi byaha bibangamira ituze ry’abaturage.”
AIP Mwesigye yabasabye kujya bakangurira abaturage ko buri wese agomba kuba ijisho rya mugenzi we bagahanahana amakuru hagati yabo. Ikindi yasabye aba banyerondo ni ukujya batangira amakuru ku gihe mu gihe bahuye n’ibibazo batabasha gukemura bo ubwabo cyangwa mu gihe babonye ikitagenda neza, Polisi ikababa hafi ikabafasha.
