POLISI Y'U RWANDA

Kuri uyu wa mbere tariki ya 6 Mata, mu Kagari ka Nyacyerera, umurenge wa Kigarama, akarere  ka Kirehe habereye inama yo kwigira hamwe ingamba zo gukaza umutekano, ikaba yahuje inteko z’utugari tw’uwo murenge hamwe n’abayobozi  ku rwego rw’umurenge bose hamwe bakaba bageraga kuri 300.

Muri iyo nama, Assistant Inspector of Police (AIP) Harelimana Gahigi  DCLO ushinzwe guhuza ibikorwa bya Polisi n’abaturage, yashimiye abayitabiriye inama uruhare rwabo mu gufatanya n’inzego z’umutekano mu gucunga umutekano w’aho batuye.

Yabasabye kongera imbaraga mu gukumira no kurwanya abakora ibikorwa bitemewe n’amategeko byiganjemo ubujura buciye icyuho bukunze kurangwa muri uwo murenge.

Akaba yagize ati:”Igikorwa cyose kitemewe n’amategeko kigira ingaruka ku mutekano w’abaturage, niyo mpamvu bigomba kurwanywa, n’umuntu wese ubigiramo uruhare agashyikirizwa inzego za Polisi cyangwa izindi bireba”.

Yanavuze ko kunywa ibiyobyabwenge nka Kanyanga, urumogi n’izindi nzoga z’inkorano bituma ubinyoye yishora mu bindi byaha nko gukubita no gukomeretsa, ubujura, gufata abana n’abagore ku ngufu n’ibindi byaha.

AIP Gahigi yabasabye gukaza amarondo muri iki gihe tugiyemo cyo kwibuka  Jenoside yakorewe abatutsi muri 1994 kandi bakazarushaho kuzitabira ibiganiro bizabera mu midugudu n’utugari aho batuye.

Yaboneyeho kandi umwanya wo gusaba abo bayobozi gukomeza kurwanya ibi byaha, bagakomeza kubumbatira umutekano w’aho batuye bashishikariza urubyiruko kwirinda ibiyobyabwenge kandi bakabafasha kwibumbira mu makoperative kugira ngo babarinde kwihugiraho no kwishora mu biyobyabwenge.

Umuyobozi w’umurenge Théoneste Nizeyimana yasabye abari bitabiriye inama kujya bamenya abaturanyi babo n’ingo zifitanye amakimbirane bakazimenyesha inzego zibishinzwe kugirango  bazigire  inama  mbere y’uko amakimbirane yabo avamo ingaruka zikomeye zirimo no kwicana.

Yasoje asaba  kurangwa n’ikinyabupfura, ubunyangamugayo, ahubwo bakarushaho gutangira amakuru ku gihe, birinda ikintu cyose cyahungabanya umutekano aho baketse ikibi bakihutira kumenyesha Polisi cyangwa izindi nzego z’umutekano.