Urubyiruko rwo mu mujyi wa Kigali rwasabwe kwirinda  ibiyobyabwenge,ahaubwo rukangurirwa kwitabira imirimo iruteza imbere ndetse ikanateza imbere igihugu muri rusange.

Hari mu gikorwa cy’ubukanguramba mu kurwanya ibiyobyabwenge mu rubyiruko. Igikorwa cyabaye kuri uyu wa Gatanu Tariki 07 Nzeri 2018,  kibera mu karere ka Nyarugenge mu murenge wa Kimisagara,cyateguwe n’urubyiruko rw’abakorerabushake mu kurwanya ibyaha.

butumwa bwatanzwe n’umuyobozi w’akarere wungirije  ushinzwe imibereho myiza y’abaturage mu karere ka Nyarugenge,  Ndayisenga Jean Marie Vianney yasabye uru rubyiruko kureka ibiyobyabwenge ahubwo rukihatira kwitabira imirimo yaruteza imbere.

Ndayisenga yasabye uru rubyiruko rw’abakorerabushake gukomeza kugira uruhare mu kuzamura imibereho myiza y’abaturage ndetse banagira uruhare mu kurwanya ibyaha hirya no hino mu gihugu.  

Yagaragarije uru byiruko ko arirwo igihugu gitezeho ejo hazaza,arwibutsa ko kitashobora kugera ku ntego kihaye z’iterambere mu gihe hari  urubyiruko rurimo gutakaza  ubuzima mu biyobyabwenge n’ibindi bikorwa bibi.

Yagize ati:” Igihugu ntigishobora kugera ku ntego kihaye mu gihe hari urubyiruko rugikoresha ibiyobyabwenge, Ntidushobora kwemera ko imbaraga zanyu zikomeza kwangirikira mu biyobyabwenge aho kuzikoresha ibyubaka igihugu n’ibibateza imbere mwebwe ubwanyu.”

Yakomeje asaba urubyiruko gushyira hamwe bakarwanya ibiyobyabwenge bagahana hana amakuru n’inzego z’umutekano mu gufata abakekwaho gukwirakwiza no gukoresha ibiyobyabwenge.

Murenzi Abdallah , Umuhuzabikorwa w’urubyiruko rw’abakorerabushake ku rwego rw’igihugu yashimiye uru rubyiruko ku bikorwa byiza bakora kandi bimaze gutanga umusaruro ugaragara mu muryango nyarwanda.

Yavuze ko muri uku kwezi kwa Nzeri uru rubyiruko rwateguye ubukangurambaga bugamije kurwanya ibiyobyabwenge mu rubyiruko ndetse bazanagira uruhare mu bikorwa bitandukanye mu guteza imbere imiberrho myiza y’abaturage nko gukangurira abaturage ibikorwa by’isuku n’isukura, kurengera ibidukikije, aho biteganyijwe ko bazatera ibiti bigera ku bihumbi 300 hirya no hino mu gihugu.

Umuyobozi w’ishami rishinzwe imicungire y’ ibiza muri Polisi y’u Rwanda  Senior Superintendent of Police (SSP) Vita Hamza, yagaragaje ko ibiyobyabwenge biri mu bintu bituma habaho ibyaha bitandukanye nko  gufata ku ngufu abana, gukubita no gukomeretsa ndetse n’ibindi byaha.

Yaboneyeho gusaba uru rubyiruko gukomeza gukangurira abanyarwanda kwirinda ibiyobyabwenge bityo bizafasha mu kurwanya no gukumira ibyaha muri rusange.

 Muri ubu bukangurambaga kandi bwabereye mu mu murenge wa Kimisagara mu karere ka Nyarugenge,  Cyubahiro Elly ,umwe mu rubyiruko rwari rwarangijwe n’ibiyobyabwenge yatanze ubuhamya agaragaza ko nyuma yo kureka ibiyobyabwenge hari byinshi amaze kwigezaho bimuteza imbere ndetse akaba yaranafashije urubyiruko rugera kuri 30 kwikura mu biyobyabwenge narwo rushobora kwiteza imbere binyuze mu kwihangira imirimo.

Cyubahiro yakomeje asaba urubyiruko rukiyangiriza ubuzima rukoresha ibiyobyabwenge kubireka ahubwo rugashaka imirimo yaruteza imbere.

Urubyiruko rw’abakorerabushake  rugira uruhare rutandukanye mu bikorwa bifasha abaturage kwiteza imbere mu mibereho myiza nko kubaha amatungo, kubakira abatishobye ndetse no kubaka imihanda y’imigenderano mu midugudu.

Kugeza ubu mu Rwanda harabarirwa abanyamuryango b’urubyiruko rw’abakorerabushake barenga  ibihumbi 250, bakaba bafite intego yo kuzaba bagera kuri Miliyoni mu mpera z’umwaka wa 2020.