POLISI Y'U RWANDA

Kuri uyu wa Mbere, tariki ya 25 Gicurasi 2025, Umuyobozi Mukuru wa Polisi y’u Rwanda (IGP), CG Felix Namuhoranye, yatangije ku mugaragaro inama ihuza abahagarariye Komite zo mu bihugu bigize RECSA, iziga ku bijyanye  no gukomeza guhuriza hamwe imbaraga  mu guhangana n’ikwirakwizwa ry’intwaro rinyuranyije n’amategeko.

Ni inama ya 17 y’akanama ngishwanama ka Tekiniki (TAC) k'Ikigo cy’akarere gishinzwe kurwanya ikwirakwizwa ry’intwaro nto n’izoroheje (RECSA) yayobowe na IGP Namuhoranye, ari nawe muyobozi mukuru wa Komite y’ubujyanama mu bya tekinike (TAC) ihuza abayobozi mu by’umutekano n’abafata ibyemezo hagamijwe gukomeza ubufatanye mu guhangana n’ikwirakwizwa ry’intwaro nto n’izoroheje mu buryo butemewe mu karere k’ibiyaga bigari, ihembe ry’Afurika ndetse no mu bindi bihugu bihana imbibi na byo.

Uyu muryango uhuza inzego zishinzwe kugenzura iyubahirizwa ry’amategeko mu bihugu 15, ari byo; Somalia, Uganda, Kenya, Tanzania, u Burundi, Ethiopia, Eritrea, Djibouti, Sudani, Sudani y'Epfo, Repubulika Iharanira Demokarasi ya Congo, Seychelles, Congo, Repubulika ya Santarafurika n’u Rwanda arirwo ruyoboye akanama ngishwanama mu bya Tekiniki ndetse n’inama y’abaminisitiri.

IGP Namuhoranye yagarutse ku buryo rusange bwo kurwanya ibyaha bituruka ku mbunda nto zikigaragara mu baturage batuye mu bihugu binyamuryango bya RECSA ndetse asaba ko hashyirwaho ingamba zihamye no guhuza ibikorwa kugira ngo ibikorwa bihuriweho byo kurwanya ikwirakwizwa ry’intwaro mu baturage bicike, ibyaha bikorerwa ku ikoranabuhanga n’ibikorwa by’iterabwoba birusheho gutanga umusaruro.

Mu bihungabanya umutekano mu Karere byibandwaho cyane hari ibyaha bimunga ubukungu, Iterabwoba, icuruzwa ry'abantu, ubucuruzi bw'ibiyobyabwenge, ibyaha by'ikoranabuhanga ndetse n’icuruzwa ry’intwaro.

Yagize ati: "Hagomba gushyirwa imbaraga mu guhuriza hamwe amakuru kugira ngo adufashe gukurikirana no kuburizamo abakoresha n’abakwirakwiza intwaro nto n’izoroheje. Biradusaba ubushake bukomeye bwo guteza imbere itumanaho n’ubufatanye bihoraho hagati yacu kugira ngo bidushoboze kwihuta kurusha abo bakwirakwiza intwaro mu baturage."

IGP Namuhoranye yakomeje avuga ko gushyira imbaraga mu kumva kimwe uko umutekano uhagaze, guhanahana amakuru, no kubonera ku gihe amakuru ku byaha bijyanye no gukwirakwiza intwaro ari byo bigomba kwibandwaho mu biganiro.

Umunyamabanga Nshingwabikorwa wa RECSA, Bwana Jean Pierre Betindji, yavuze ku kamaro k’iyi nama mu gihe ibihugu bigize uyu muryango byitegura gutangira icyiciro gishya cy’igenamigambi ry'imyaka itanu.

Yagize ati: “Mu gihe turimo gusoza ishyirwa mu bikorwa rya Gahunda y’Ingamba dusanzwe dukurikiza no kwitegura icyiciro gikurikira cy’imyaka itanu, iyi nama ni urubuga rukomeye rudufasha gusuzuma aho tugeze, kurebera hamwe ibibazo duhura nabyo no gufatira hamwe imyanzuro ifatika izakomeza kudufasha gahangana n’bibazo duhura nabyo.”

Betindji yakomoje kuri bimwe mu byagezweho mu mwaka ushize birimo kwemezwa kw’amasezerano avuguruye ashyiraho RECSA ndetse no gukomeza gukora ivugurura mu bijyanye na Porotokole y’umuryango i Nairobi.

Iyi nama izasesengura inyandiko na raporo zitandukanye isuzume n'ishyirwa mu bikorwa ry’imyanzuro yafashwe n’inama zabanje, raporo z’imari ndetse n’umushinga wa gahunda za RECSA zizashyirwa mu bikorwa guhera muri uyu mwaka kugeza mu wa 2031.

Iyi nama izahuza abahagarariye Polisi z’ibihugu, ba minisitiri b'umutekano imbere mu bihugu binyamuryango ndetse n’abahuzabikorwa b’ibigo by’igihugu bishinzwe kurwanya ikwirakwizwa ry’intwaro nto n’izoroheje (SALW) baturutse mu bihugu bigize RECSA.

Biteganyijwe ko izamara iminsi itanu kuva ku wa 25 kugeza ku wa 29 Gicurasi, ibera ku Cyicaro gikuru cya Polisi y’u Rwanda ku Kacyiru.