Kinyarwanda
English
Minisitiri w’Umutekano w’Imbere mu Gihugu, Dr Vincent Biruta, akaba n’Umuyobozi w’Inama y’Abaminisitiri y’Ikigo gishinzwe kurwanya ikwirakwizwa ry’intwaro nto n’izoroheje mu karere k’Afurika y’Iburasirazuba n’akarere k’Ibiyaga Bigari (Regional Centre on Small Arms-RECSA), Kuri uyu wa Gatanu, tariki ya 29 Gicurasi, yatangije ku mugaragaro inama ihuza abayobozi ba Polisi zo mu bihugu bigize RECSA.
Ni inama ibaye ku nshuro ya 17 y’akanama ngishwanama gahuza abayobozi mu by’umutekano n’abafata ibyemezo hagamijwe gukomeza ubufatanye mu guhangana n’ikwirakwizwa ry’intwaro nto n’izoroheje mu buryo bunyuranyije n’amategeko mu karere k’ibiyaga bigari, ihembe ry’Afurika ndetse no mu bindi bihugu bihana imbibi na byo.
Minisitiri w’Umutekano w’imbere mu gihugu, Dr. Vincent Biruta, afungura inama ku mugaragaro yavuze ko ari ingenzi mu gufasha kwisuzuma, kwishimira ibyagezweho no gufatira hamwe ingamba zo gukemura ibibazo bishingiye ku ikwirakwizwa ry’intwaro mu bihugu binyamuryango ndetse no gushyiraho ingengo y’imari ihoraho.
Yagize ati: “Inama nk’iyi ihuza ubuyobozi bwa polisi zo muri uyu muryango, iba ari umwanya mwiza wo kurebera hamwe uburyo duhanahana amakuru ku banyabyaha ndetse n’abakwirakwiza intwaro mu baturage bityo hagafatirwa hamwe ingamba zo kubirwanya, hashyirwaho ingengo y’imari ihoraho yo gufasha umuryango wa RECSA.’’
Minisitiri Biruta yagarutse ku buryo rusange bwo guhana abakwirakwiza imbunda nto mu baturage batuye mu bihugu binyamuryango bya RECSA, asaba ko hashyirwaho ingamba zihamye zo kubyirinda ndetse aboneraho gusaba ko bahuza ibikorwa bihuriweho byo kurwanya ikwirakwizwa ry’intwaro mu baturage kugira ngo bicike.
Umuyobozi Mukuru wa Polisi y’u Rwanda (IGP), CG Felix Namuhoranye akaba n’umuyobozi mukuru wa Komite y’ubujyanama mu bya tekinike (TAC) nawe yakomoje ku bihungabanya umutekano mu Karere byibandwaho cyane birimo ibyaha bimunga ubukungu, Iterabwoba, icuruzwa ry'abantu, ubucuruzi bw'ibiyobyabwenge, ibyaha by'ikoranabuhanga ndetse n’icuruzwa ry’intwaro.
Yagize ati: "Hagomba gushyirwa imbaraga mu guhuriza hamwe amakuru kugira ngo adufashe gukurikirana no kuburizamo abakoresha n’abakwirakwiza intwaro nto n’izoroheje. Biradusaba ubushake bukomeye bwo guteza imbere itumanaho n’ubufatanye bihoraho hagati yacu kugira ngo bidushoboze kwihuta kurusha abo bakwirakwiza intwaro mu baturage."
IGP Namuhoranye yakomeje agira ati: ‘‘Iyi nama ni amahirwe akomeye yo kuva ku biganiro bya politiki gusa ahubwo tukagera ku myanzuro ifatika kandi ishimangira iterambere ry’ibihugu binyamuryango ndetse bishingiye ku makuru yizewe neza.”
Umunyamabanga Nshingwabikorwa wa RECSA, Bwana Jean Pierre Betindji, yavuze ku kamaro k’iyi nama mu gihe ibihugu bigize uyu muryango byitegura gutangira icyiciro gishya cy’igenamigambi ry'imyaka itanu, anashimira abayobozi bacyuye igihe.
Betindji yagize ati: “Mu mwaka ushize twakoranye neza n’imiryango mpuzamahanga duhanahana amakuru ku bijyanye n’ikwirakwizwa ry’intwaro mu baturage, harimo umuryango w’Abibumbye ndetse n’umuryango w’Afurika yunze ubumwe. Muri uyu mwaka dutangiye turasabwa gushyiraho uburyo bwo kugenzura intwaro nto zikwirakwizwa mu karere kugira ngo hakumirwe ibibazo ziteza.”
Betindji yakomoje kuri bimwe mu byagezweho mu mwaka ushize birimo kwemezwa kw’amasezerano avuguruye ashyiraho RECSA ndetse no gukomeza gukora ivugurura mu bijyanye na Porotokole y’umuryango i Nairobi.
Yasoje ashishikariza buri munyamuryango wa RECSA wese kwiyumvamo umuryango mpuzamahanga ushinzwe gucunga amasasu n’ibindi bikoresho bya gisirikare kuko batangiye gukorana nawo ndetse ko uzajya ubafasha kubika amasasu n’imbunda bizajya bifatanwa abaturage babifite mu buryo bunyuranyije n’amategeko.
