Kinyarwanda
English
Abayobozi n'abahagarariye Polisi baturutse mu bihugu bitanu by’Umuryango uhuza abayobozi bakuru ba Polisi mu Karere ka Afurika y'Iburasirazuba (EAPCCO) bateraniye i Kigali mu nama igamije gushyira mu bikorwa ibyavuye mu cyiciro cya mbere cy'umushinga wo 'Gushyigikira buri ntambwe yatewe (Empowering Every Badge) mu Buringanire.' Ni inama izemerezwamo ibikorwa iby’ingenzi buri gihugu gikeneye mu cyiciro cya kabiri cy’uyu mushinga.
Iyi nama y'iminsi ine yatangiye kuri uyu wa Mbere, tariki ya 21 Nzeri, ku cyicaro gikuru cya Polisi y'u Rwanda, ku Kacyiru. Yitabiriwe n'abayobozi muri Polisi baturutse mu bihugu bya Djibouti, Kenya, Seychelles, Tanzania n'u Rwanda, Komite ishinzwe Uburinganire ya EAPCCO, Ubunyamabanga bwa EAPCCO, ndetse n'Ishami ry'Umuryango w'Abibumbye rishinzwe kurwanya Ibiyobyabwenge n'Ibyaha mu Karere (UNODC ROEA).
Uyu mushinga ni gahunda yo ku rwego rw'Akarere ishyirwa mu bikorwa na EAPCCO, UNODC n'abafatanyabikorwa batandukanye. Igamije guteza imbere uburinganire no kongera uruhare n'ubuyobozi bw'abagore mu nzego z'umutekano n'ubutabera mu Karere ka Afurika y'Ibirasirazuba.
Iyi nama yafunguwe ku mugaragaro n'Umuyobozi Mukuru Wungirije wa Polisi y'u Rwanda ushinzwe Ubutegetsi n'Abakozi (DIGP), DCG Jeanne Chantal Ujeneza, mu izina ry'Umuyobozi Mukuru wa Polisi y’u Rwanda akaba n’Umuyobozi w’inama nkuru ya EAPCCO.
Yagize ati: “Twishimiye cyane kuba i Kigali ari ho hatoranyijwe kwakira iyi nama y'ingenzi, igaragaza intambwe yo kuva ku gutegura no kureba ibyavuye mu bushakashatsi, tukajya mu cyiciro cyishyirwa mu bikorwa rya gahunda yo gushyigikira intambwe yatewe mu buringanire, icyiciro cya kabiri.”
DCG Ujeneza yavuze ko icyiciro cya mbere cyagaragaje imbogamizi abagore bahura na zo mu kwinjira mu nzego z'umutekano, gukomeza kuzikoramo no gutera imbere muri uwo mwuga, harimo no kugera mu myanya y'ubuyobozi bukuru.
Yagize ati: “Muri uyu mwanya, nk'abahagarariye abakuru ba Polisi, turasuzuma ibyavuye mu cyiciro cya mbere n'ibyifuzo byatanzwe, tunatanga umurongo ngenderwaho, tureba ibyihutirwa kuri buri gihugu n'aho twiteguye kurushaho gutanga umusanzu.”
Umuyobozi Mukuru w'Ubunyamabanga bwa EAPCCO, akaba n'Umuyobozi w'Ibiro bya Interpol mu Karere ka Afurika y'Ibirasirazuba, Bwana Apollo S. Africa, yavuze ko abayobozi ba Polisi bakiriye neza ibyavuye mu cyiciro cya mbere, kandi ko buri gihugu kizagaragaza ibikorwa bijyanye n'amategeko n'imikorere bisanzwe bigenderwaho.
Yagize ati: “Ubu tugeze mu cyiciro cya kabiri cy'umushinga, aho tugomba gukorera hamwe tugashyira mu bikorwa ibikorwa bigamije gukemura ibibazo byagaragajwe ko bigomba gukemurwa, kandi tukabishyira mu bikorwa mu bihugu byacu.”
Impuguke ya UNODC mu byerekeye uyu mushinga, Madamu Tina Mykkanen, yavuze ko iyi gahunda y'umushinga wo Gushyigikira buri ntambwe yatewe mu Buringanire, itagamije gusa kongera umubare w'abagore bakora mu nzego z'umutekano, ahubwo inagamije no gusobanukirwa ibituma abagore bashobora kwinjira muri izi nzego, kuzikomeza, gutera imbere no kugera mu myanya y'ubuyobozi.
Yagize ati: “Rimwe mu masomo y'ingenzi twakuye mu cyiciro cya mbere ni uko kugira umubare w'abagore uhagije byonyine bidahagije, ahubwo hakenewe gukorwa byinshi bibyaza umusaruro umuhate bagize.”
Umushinga wa 'Empowering Every Badge' ni gahunda ishyirwa mu bikorwa na EAPCCO, UNODC n'abafatanyabikorwa, hagamijwe guteza imbere uburinganire bw'abagore n'abagabo no guteza imbere ubuyobozi bw'abagore mu nzego zishinzwe kubahiriza amategeko mu Karere k'Iburasirazuba bwa Afurika. Ikaba iterwa inkunga na Guverinoma y'Ubudage.
Polisi y'u Rwanda ikaba yongeye gushimangira ko ishyigikiye icyiciro cya kabiri cy'uyu mushinga. Ikigo cyayo cy'Indashyikirwa mu Karere mu gutanga ubumenyi mu bijyanye n'uburinganire no kurwanya ihohoterwa rishingiye ku gitsina cyiteguye kwakira amahugurwa no gufasha mu kungurana ubumenyi mu rwego rwo gushyigikira uyu mushinga.
