POLISI Y'U RWANDA

Abanyeshuri 328 baturuka mu mashuri yisumbuye 41 yo mu karere ka Kicukiro bagize amahuriro yo gukumira ibyaha,  ku itariki 26 Gashyantare bahuguwe na Polisi  ku ruhare rwabo mu gukumira ibyaha. 

Bahuguriwe mu Ishuri ry’Imyuga n’Ubumenyingiro, ishami rya Kigali(IPRC Kigali), ribarizwa mu karere ka Kicukiro. Buri kigo cy’ishuri cyari gihagarariwe n’abanyeshuri umunani.

Baganirijwe ku bubi bw’ibiyobyabwenge, ihohoterwa rishingiye ku gitsina n’uruhare rwabo mu kubikumira no kubirwanya.

Umuyobozi wa Polisi  mu Mujyi wa Kigali, Assistant Commissioner of Police (ACP) Rogers Rutikanga yababwiye ko urumogi, Kanyanga, Mayirungi, Muriture, Chief Waragi, Suzie, Kole (Kuyihumeka) na Lisansi (Kuyihumeka) bifatwa nk’ibiyobyabwenge mu Rwanda kubera ko bimwe muri byo bifite methanol(ikinyabutabire cy’uburozi) irengeje igipimo cya zero n'ibice bitanu ku ijana (0.5%) mu bibigize; ibindi bikaba birengeje igipimo cya mirongo ine na gatanu ku ijana (45%) bya alukoro; nk’uko biteganywa n’Itegeko N°03/2012 ryo ku wa 15/02/2012 rigena imikoreshereze y’ibiyobyabwenge n’urusobe rw’imiti ikoreshwa nka byo mu Rwanda.

Yababwiye ati,"Umunyeshuri unywa ibiyobyabwenge aba yangiza ahazaza he. Bamwe muri bagenzi banyu batwara inda zitateganyijwe bitewe no kubyishoramo; ku buryo bibaviramo kwandura zimwe mu ndwara zandurira mu mibonano mpuza bitsina n’izindi ngaruka zitandukanye. Murasabwa kwirinda ibiyobyabwenge by’amoko yose; kandi mukangurire urubyiruko bagenzi banyu kutabyishoramo, mubabwira ububi bwabyo."

Yabashimiye kuba barashyizeho amahuriro yo kubirwanya; kandi abasaba gushyira imbaraga mu gukangurira ibyiciro byose by’abantu kutabyishoramo no gutungira agatoki Polisi y’u Rwanda ababicuruza n’ababinywa.

ACP Rutikanga yakomeje ababwira ati,"Nk’uko byitwa, ibiyobyabwenge byangiza, kandi biyobya ubwenge bw’uwabinyoye. Ntushobora gutsinda mu ishuri ubinywa. Murasabwa kwirinda no kurwanya ikintu cyose gishobora kwangiza ahazaza hanyu."

Umuyobozi w’akarere ka Kicukiro ushinzwe ubukungu, Angelique Mukunde yabwiye abo banyeshuri ati,"Muri imbaraga z’igihugu. Mukwiriye kuzikoresha mu biteza imbere igihugu no no gusigasira umutekano."

Yashimye Polisi y’u Rwanda kuri ubwo  bukangurambaga bugamije kurinda urubyiruko ndetse n’umuryango nyarwanda kwishora mu biyobyabwenge; kandi ayizeza ubufatanye mu kurwanya no gukumira ibyaha muri rusange.

Mu karere ka Kicukiro hamaze gushyirwaho amahuriro yo kurwanya ibyaha 81. 41 ari mu mashuri, 21 ni ay’abatwara abagenzi ku magare, 14 ni ay’ababatwara kuri moto, 08 yashyizweho n’abakora imirimo y’ubwogoshi no gutunganya imisatsi; naho abiri ni ay’abikorera imitwaro bashaka amafaranga (Abakarani-ngufu).