Kinyarwanda
English
Kuri uyu wa kabiri tariki ya 26 Kanama, mu Kagari ka Rukatsa umurenge wa Kagarama akarere ka Kicukiro habereye inama yo kwigira hamwe ingamba zo gukaza umutekano, ikaba yahuje abayobozi b’utugari twose tugize akarere ka Kicukiro, abayobozi b’inkeragutabara ku rwego rw’imirenge, n’abapolisi bashinzwe guhuza ibikorwa bya Polisi n’iby’abaturage ku rwego rw’imirenge bose hamwe bagera ku 102.
Muri iyo nama, umuyobozi wa Polisi mu Karere ka Kicukiro Chief Superintendent of Police (CSP) Fred Ndoli, yashimiye abayitabiriye uruhare rwabo mu gufatanya n’inzego z’umutekano mu gucunga umutekano w’aho batuye, anabasaba kongera imbaraga mu gukumira no kurwanya abakora ibikorwa bitemewe n’amategeko.
Akaba yagize ati:”Igikorwa cyose kitemewe n’amategeko kigira ingaruka ku mutekano w’abaturage, niyo mpamvu bigomba kurwanywa, n’umuntu wese ubigiramo uruhare agashyikirizwa inzego za Polisi cyangwa izindi bireba”.
Yanavuze ko kunywa ibiyobyabwenge nka Kanyanga, urumogi n’izindi nzoga z’inkorano bituma ubunyweye yishora mu bindi byaha nko gukubita no gukomeretsa, ubujura, gufata abana n’abagore ku ngufu n’ibindi byaha.
CSP Ndoli akaba yaboneyeho umwanya wo gusaba abo bayobozi gukomeza kurwanya ibi byaha, bagakomeza kubumbatira umutekano w’aho batuye.
Yakomeje abasaba buri gihe kumenya imiryango ibanye mu makimbirane, inzego zibishinzwe zikayigira inama mbere y’uko amakimbirane yabo avamo ingaruka zikomeye.
CSP Ndoli yasoje asaba abitabiriye iyi nama kurangwa n’ikinyabupfura, ubunyangamugayo n’ubunyamwuga, birinda ikintu cyose kitajyanye n’inshingano zabo.
