Kuwa kane tariki ya 23 Kanama abanyeshuri barererwa m’urwunge rw’amashuri rwa Kimisange mu murenge wa Kigarama baganirijwe na  Polisi y’u Rwanda kubufatanye n’ubuyobozi bwa Komisiyo y’igihugu ishinzwe kurwanya ibiyobyabwenge  mu rubyiruko uko bakwirinda ibiyobyabwenge n’ingaruka zabyo.

Aganira n’aba banyeshuri Chief Inspector of Police Ceraphine Nyirandikubwimana ushinzwe guhuza ibikorwa bya Polisi n’abaturage mu karere ka Kicukiro, yakanguriye aba banyeshuri kwirinda ibiyobyabwenge kuko bigira ingaruka mbi ku myigire yabo.

Yagize ati:”Ibiyobyabwenge birimo amoko atandukanye, aha twavuga  nk’urumogi, mugo, kanyanga, inzoga z’inkorano n'ibindi, kandi binakoreshwa  mu buryo butandukanye, hari ababinywa,ababyisiga,ababirya,ababishoreza icyo byose bihuriyeho nuko byangiza ubuzima bw’ubikoresha bikanamutera gukora ibyaha bitandukanye.’’

CIP Nyirandikubwimana yakomeje agaragaza ko ibiyobyabwenge bikururira uwabikoresheje ingaruka zitandukanye

Yagize ati:’’ Guta ishuri, gutwara inda ku bana b’abakobwa, amakimbirane yo mu muryango, gukubita no gukomeretsa, gufungwa kuwa bifatanwe byose nizimwe mungaruka umuntu ukoresha ibiyobyabwenge ahura nazo.’’

CIP Nyirandikubwimana asoza  asaba urubyiruko kwirinda ababashuka bakabashora mu  biyobyabwenge .

Yagize ati:’’ Mukwiye kugira uruhare mu guhindura imyumvire ya bagenzi banyu  bakigaragara mu ngeso mbi ibi byose muzabifashwa n’inyigisho zitangirwa mu matsinda arwanya ibyaha akorera muri iri shuri ndetse no gutungira agatoki inzego z’umutekano ahagaragara ibiyobyabwenge.’’

Mujyambere Jean Pierre umukozi wa Komisiyo y’igihugu ishinzwe kurwanya ibiyobyabwenge mu rubyiruko yabwiye aba banyeshuri ko bidakwiye ko umuntu wagize amahirwe yo kwiga yakwishora mu ngeso mbi zirimo n’ibiyobyabwenge.

Yagize ati:’’umuntu wize uzi agaciro k’ubuzima, ntibikwiye ko yishora mu biyobya bwenge kuko aba azi neza ko bigira ingaruka ku buzima bwe, bikanamushora mu bikorwa bihungabanya umutekano. Mukwiye gufata iya mbere mu guhindura imyumvire ya bagenzi banyu batarasobanukirwa ingaruka zabyo bakabireka.’’

Mujyambere asoza abwira urubyiruko ko icyo umuntu azabacyo agiharanira kandi ko bitagerwaho mugihe udafite ubuzima bwiza bityo bakwiye kumva impanuro zibakangurira kutishora mu biyobyabwenge bagirwa n’abayobozi munzego zitandukanye.