Kinyarwanda
English
Polisi ikorera mu karere ka Kayonza mu murenge wa Mukarange yagiranye ibiganiro n’abanyeshuri ba GS Mukarange Catholic ibasaba gukumira no kurwanya ibiyobyabwenge n’icuruzwa ry’abantu.
Ni ibiganiro byitabiriwe n’abanyeshuri basaga 2000 babihabwa n’umuvugizi wa Polisi mu Ntara y’Iburasirazuba Chief Inspector of Police (CIP) Hamdun Twizeyimana ari kumwe n’umuyobozi w’ishuri Pascal Kanamugire.
CIP Twizeyimana yasabye abanyeshuri ba GS Mukarange kurwanya ikoreshwa ry’ibiyobyabwenge ndeste n’ikwirakwizwa rya byo kuko kenshi bikunze kwiganza mu rubyiruko ari nacyo kiciro nabo babarirwamo.
Yagize ati ” Urubyiruko nimwe mbaraga igihugu gitezeho kugiteza imbere, iyo mwishoye mu kunywa ibiyobyabwenge mutakaza ikizere cyanyu n’icyo igihugu cyari kibafitiye muri rusange, ahubwo kikabatakazaho byinshi cyagakoresheje ibindi bikorwa byateza imbere abanyarwanda.”
Yakomeje ababwira ko ibiyobyabwenge bakwiye kubirwanya bivuye inyuma kuko bigira ingaruka mbi nyinshi, ababwira ko biza ku isonga mu guhungabanya umutekano nko gukurura amakimbirane mu miryango; ihohoterwa rishingiye ku gitsina, ubujura, urugomo n’ibindi kubyamagana bikwiye kuba ibya buri wese.
CIP Twizeyimana yabasabye kandi kurwanya icuruzwa ry’abantu kuko rigira ingaruka mbi k’urikorewe, umuryango we n’igihugu muri rusange.
Yagize ati:” Kenshi abakora ibi bikorwa bya kinyamaswa baza bizeza abo bagiye gutwara akazi keza n’amashuri meza hanze y’igihugu nyamara bagerayo bagakoreshwa imirimo y’ubucakara, bakabashora mu buraya abandi bakabatoza kuba ibyihebe n’intagondwa. Turabashishikariza kurwanya iri curuzwa ry’abantu kuko ari igikorwa cya kinyamaswa cyambura umuntu ubumuntu kikamutesha agaciro.”
Yabasabye kubirwanya batanga amakuru y’ababikora n’abarikorerwa kugira ngo bikumirwe bitaraba.
CIP Twizeyimana yakanguriye abanyeshuri b’abakobwa kwirinda inda zitateguwe birinda ibishuko; ababaha impano zitandukanye kuko aribwo buryo babashukisha kugira ngo bagere kubyo bashaka birimo kubasambanya bityo bikabaviramo gutwara inda bakiri bato bikabaviramo guta ishuri.
Umuyobozi wa GS Mukarange Catholic Pascal Kanamugire yasabye abanyeshuri guha agaciro inyigisho bahawe na Polisi kuko ariyo azahindura ubuzima bw’ejo hazaza habo ndeste bikazateza igihugu imbere muri rusange.
