Kinyarwanda
English
Igikorwa cy’ubukangurambaga bwa Polisi ku rwego rw’igihugu bwo kurwanya no gukumira ihohotera rishingiye ku gitsina, cyasojwe none tariki ya 30 Ukuboza, mu karere ka Karongi mu Ntara y’Iburengerazuba, aha abari bitabiriye iki gikorwa kimwe n’abandi banyarwanda bakaba basabwe gukomeza gutera intambwe barikumira dore ko ari icyaha kibangamira uburenganzira bw’ibanze bwa muntu.
Iki gikorwa cyabereye mu cyumba cy’inama y’Intara y’Uburengerazuba mu murenge wa Bwishyura mu karere ka Karongi.
Igikorwa cy’ubukangurambaga ku gukumira ihohotera kikaba cyari kitabiriwe n’abahagarariye urubyiruko, n’abagore, abakozi b’urwego rwa DASSO, abagenzacyaha, abashinzwe komite zo gukumira ibyaha, n’abapolisi bashinzwe guhunda zihuza Polisi n’abaturage mu bikorwa byo gukumira ibyaha (DCLOs), aba bose bakaba bari baturutse mu mirenge n’uturere dutandukanye tw’iyo Ntara.
Umuyobozi w’intara y’uburengerazuba, Mukandasira Caritas, yavuze ko ibyaha bijyanye n’ihohotera rishingiye ku gitsina bikagaragara hamwe na hamwe muri iyo Ntara, akaba asanga ubufatanye bw’inzego zitandukanye harimo n’abaturage ari ngombwa kugira ngo bene ibyo byaha bicike.
Madam Mukandasira yashimye kandi imikoranire myiza iri hagati ya Polisi y’igihugu mu bikorwa byo gukumira ihohoterwa kimwe n’ibindi byaha bitandukanye.
Akaba kandi yasabye abitabiriye aya mahugurwa kurangwa n’ubunyamwuga mu mirimo bashinzwe, bashishikariza abo bayobora gukumira ndetse no kurwanya ihohoterwa iryo ari ryo ryose, kurwanya ibyaha bijyanye n’ibiyobyabwenge, ihohotera rishingiye ku gitsina hagamijwe umutekano n’ubuzima buzira umuze bw’abaturage muri rusange.
Chief superintendent Reverien Rugwizangoga, uyobora polisi mu Ntara y’uburengerazuba, yasabye abari bateraniye muri aya mahugurwa kuzashyira ubumenyi bayakuyemo, mu bikorwa kugira ngo ihohotera rishingiye ku gitsina ricike burundu hirya no hino mu turere tw’Intara y’Uburengerazuba.
CSP Rugwizangoga yagaragarije abari aho ububi bw’ibiyobyabwenge anababwira bitera ibindi byaha birimo nko gusambanya abagore n’abakobwa ku ngufu, ubujura, urugomo n’ibindi.
Yashimye kandi ubufatanye bwa Polisi n’abaturage mu gukumira ibyaha anasaba bene iyo mikoranire yakomeza kuranga abatuye iyo Ntara hagamijwe kubungabunga umutekano.
Iki gikorwa cya Polisi cy’ubukangurambaga ku gukumira no kurwanya ihohotera rishingiye ku gitsina bwatangiriye ku ikubitiro mu karere ka Rwamagana.
