POLISI Y'U RWANDA

Polisi y’u Rwanda imaze iminsi ikangurira ababyeyi kudasibya abana ishuri babajyana mu isoko cyangwa kubakoresha imirimo itandukanye irimo n’ivunanye inabibutsa ko bisubiza inyuma imyigire y’abana ndetse ntibashobore kuzagera ku byifuzo byabo by’ejo hazaza ndetse n’ah’igihugu muri rusange.

Ni muri urwo rwego mu gitondo cyo kuri uyu Kabiri tariki ya 10 Werurwe, Polisi y’u Rwanda ikorera mu karere ka Karongi mu murenge wa Gashali yakoze igikorwa cyo  kugenzura mu ngo ababyeyi basibije abana ishuri bakabajyana mu mirimo itandukanye.

Umuvugizi wa Polisi mu ntara y’Iburengerazuba, Chief Inspector of Police (CIP) Bonaventure Twizere Karekezi avuga ko uyu mukwabu Polisi yawukoreye mu kagari ka Mwendo ku bufatanye n’abayobozi b’imidigudu maze hagaragara  abana 10 basibye ishuri muri bo harimo n’abarikuwemo burundu.

Yagize ati:   “Abayobozi b’imidugudu bafatanyije na Polisi ikorera mu murenge wa Gashali bagenzuye ingo zifite abana bataye ishuri ndetse n’ababasibije kujya kwiga bakabakoresha imirimo itandukanye niko kubona abana bagera mu icumi.”

CIP Karekezi yavuze ko bakimara kubona abo bana babahurije hamwe n’ababyeyi babo maze babaganiriza ingaruka zo gusibya no kuvana umwana mu ishuri bityo basaba ababyeyi kutavana abana mu ishuri,  abana nabo babakanguriye gukunda ishuri kuko kwiga aricyo k’intu cya mbere cy’ingenzi kigeza umuntu ku nzozi ze.

Ati:   “Twasabye ababyeyi kudasibya abana ishuri kuko bibagiraho ingaruka mu myigire yabo, kuko iyo babasibije basanga abandi barabasize mu masomo bityo bikabaviramo guhora batsindwa bitewe n’ababyeyi.  Ababyeyi twanabasabye kutavana abana mu ishuri kuko abenshi bahita bajya mu ngeso mbi zirimo kwishora mu ikoreshwa ry’ibiyobyabwenge ndetse ugasanga ab’abakobwa batwaye  inda imburagihe n’indwara zitandukanye bityo amakimbirane n’ibindi bibazo bitandukanye bikavuka mu muryango; ibi byose bikagira ingaruka ku babyeyi no ku muryango nyarwanda.”

Hagati aho hari bamwe mu bana bagaragaza ko ababyeyi babo aribo bagira uruhare rwo kubakura mu ishuri ngo kubera ko babima ibikoresho birimo imyambaro y’ishuri, inkweto ndetse n’ibindi bikoresho by’ishuri. Aha niho umuvugizi wa Polisi mu ntara y’Iburengerazuba yahereye asaba ababyeyi kwita ku nshingano n’uburenganzira bw’abana babo zirimo kubarihira ishuri, kubavuza, kutabakoresha imirimo ivunanye n’ubundi burenganzira bwose umwana yemerewe.

Ababyeyi nyuma yo kumva impanuro n’inama bahawe na Polisi y’u Rwanda bagiranye amasezerano n’ubuyobozi bw’akagari yo kutazongera kuvana abana mu ishuri no kubasibya ishuri; bavuga ko bagiye kuba abambasaderi bo gukangurira abandi babyeyi kubahiriza uburenganzira bw’abana ndetse bakajya banihutira gutanga amakuru aho babonye umubyeyi wasibije umwana.