POLISI Y'U RWANDA

Polisi ikorera mu karere ka Karongi mu mirenge ya Gitesi na Mutuntu k’ubufatanye n’inzego z’ibanze, kuri uyu wa 03 Ukwakira bakoze umukwabu mu tugari twa Byogo na Rwariro. Wari umukowabu wo gufata abakora bakanacuruza inzoga zitemewe zikorwa hifashijwe umusemburo uzwi nka Pakimaya bakavangamo  infumbire mvaruganda n’ibindi.

Muri uwo mukwabu hafashwe abantu  bagera ku icyenda (9)  bafatanwa litiro zigera kuri 3290.

Igikorwa cyo kumena izi nzoga  kitabiriwe n’umuyobozi wa Polisi mu karere ka Karongi Chief Inspector of Police (CIP) Julien Nkurikiyinka ari kumwe n’Umuyobozi w’Akarere wungirije ushinzwe imibereho myiza,  Mukase Valentine n’Umuyobozi w’ibitaro bya Kibuye Dr. Ayingeneye Violette.

Bose bakaba barahaye ubutumwa abaturage barenga 580 bari bitabiriye iki gikorwa kwirinda inzoga zitemewe n’ibiyobyabwenge muri rusange.

Umuyobozi w’Akarere wungirije Mukase Valentine yasabye abaturage kwitandukanya n’izi nzoga kuko zidindiza iterambere ryabo zikanateza n’umutekano muke.

Yagize ati: “Abantu banywa izi nzoga ziragenda zikabagira imbata zabo,  amafaranga yose babonye bagahita bayazijyanamo, umwanya wo gukora ngo biteze imbere ugasanga bari mu kabari.”

Yakomeje abagaragariza ko izi nzoga zibadindiza no mu mibereho myiza yabo n’imiryango yabo aho usanga batagira ubwisungane mu kwivuza, abana babo batiga, bahorana amakimbirane, batagira ubwiherero mbese ikijyanye n’isuku ugasanga bari inyuma.

Dr. Ayingeneye Violette yasabye abaturage kwirinda inzoga z’inkorano kuko ziba zitujuje ubuziranenge, bityo zikaba zigira ingaruka mbi ku buzima bwabo.

Yagize ati:“Izi nzoga zikorwa mu bintu bibi bitandukanye birimo umusemburo wa Pakimaya, ifumbire mvaruganda n’ibindi bitandukanye; ibi byose bigera mu mubiri w’uwabinyoye bikawutera impinduka zishobora gutera indwara zitandukanye. Turabasaba rero kuzirinda ndetse n’izemewe mukajya munywa iziri mu rugero kuko nazo iyo urengeje urugero rwagenwe bitaba byiza.”

Umuyobozi wa Polisi mu karere ka Karongi CIP Nkurikiyinka yavuze ko aba bose 9 bafatiwe mu mukwabu  wari ugamije gufata abakora, abanywa, n’abacuruza ibiyobyabwenge n’inzoga zitemewe usanzwe ukorwa  hagamijwe gukangurira abaturage kubirwanya no kubyirinda.

Ati: “Izi nzoga n’ibiyobyabwenge muri rusange, uretse kuba bitemewe kugurishwa, gukorwa, gutundwa no kunyobwa mu Rwanda kuko bihanwa n’amategeko; binateza n’umutekano muke mu baturage bikanagira ingaruka mbi ku buzima bw’ababinywa.

Nta mpamvu rero yo kwiyangiririza ubuzima no gukora ibinyuranyije n’amategeko kandi hari ibinyobwa byinshi byujuje ubuziranenge kandi byemewe n’amategeko.”

CIP Nkurikiyinka yakanguriye abaturage kutanywa, kudacuruza no kudatunda ibiyobyabwenge n’inzoga zitemewe. Aboneraho n’umwanya wo kubasaba kujya batungira agatoki inzego z’umutekano abantu bakora izi nzoga ndetse n’abacuruza ibiyobyabwenge kugira ngo habeho kurwanya no gukumira ibyaha bituruka k’ubusinzi nko gukubita no gukomeretsa, ubujura, ihohoterwa rishingiye ku gitsina, gufata ku ngufu, amakimbirane mu ngo n’ibindi.

Twabibutsa ko aba bose bajyanwe ku mirenge yabo buri wese acibwa amande angana n’ibihumbi mirongo itanu (50,000frw) nk’uko amabwiriza y’ikigo k’igihugu gishinzwe ubuziranenge (RSB) ateganya ko ubuyobozi bw’umurenge buca amande y’amafaranga y’u Rwanda kuva ku bihumbi 50 kugera ku bihumbi 500, ufashwe akora cyangwa acuruza inzoga z’inkorano zitujuje ubuziranenge ubundi zikamenerwa mu ruhame.