Kinyarwanda
English
Ku itariki 20 Gicurasi, Polisi y’u Rwanda ikorera mu karere ka Karongi, yakoze umukwabu mu kagari ka Gasaka,ko mu murenge wa Bwishyura, maze ifatira mu nzu eshanu litiro 380 za Mazutu n’imifuka itanu ya Sima, ibi byose bikaba byari bimaze iminsi mike byibwe isosiyeti y’abashinwa ikora imihanda mu karere ka Karongi na Nyamasheke yitwa Chine Road and Bridge Corporation.
Iyi mazutu ndetse na sima bikaba ari bimwe mu bikoresho byari bisanzwe byifashishwa n’iriya sosoyeti mu gukora no gutunganya umuhanda muri turere twavuzwe hejuru.
Polisi y’u Rwanda ikorera mu karere ka Karongi, ivuga ko ubuyobozi bwa sosiyeti Chine Road and Bridge Corporation, bumaze kuyigezaho ikirego cy’iyibwa ry’ibikoresho byayo isanzwe yifashisha mu gukora umuhanda, yakoze umukwabu, maze iza gufata litiro 380 za mazutu ndetse n’imifuka itanu ya sima mu nzu kwa Rukundo Anonciata,Ihorinyubaka Jean,Ngabitsinze Tharcisse,Mutabazi Oscar, na Nambajimana Eliel.
Ibi bikoresho byose byafashwe, bikaba byarahise bishyikirizwa umukozi w’iyi sosiyeti witwa Nirere Janvier, akaba yarashimiye Polisi y’u Rwanda ikorera muri aka karere kuba yarafashe ndetse ikabashyikiriza ibikoresho byabo bari bibwe.
Akimara kubishyikirizwa,Nirere yagize ati:"Ubwo twagezaga ikirego kuri Polisi, twari dufite icyizere ko izabifata nta kabuza none bibaye impamo, kuko yabifashe ndetse ikaba yanabidushyikirije.Turayishima cyane."
Uwo mukwabu kandi wafatiwemo litiro 380 z’inzoga z’inkorano zitemewe, abazenga n’abazinywa bakaba bazita "Marokeri", n’andi mazina atandukanye.
Izo nzoga zahise zangizwa. Mu gikorwa cyo kwangiza izo nzoga no kuzimena ahabugenewe, habayeho no kwigisha abaturage ububi bwa ziriya nzoga z’inkorano ndetse n’ibiyobyabwenge nk’urumogi.
Umunyamabanga Nshingwabikorwa w’Umurenge wa Bwishyura,Mutuyimana Emmanuel, witabiriye iki gikorwa , yakanguriye abaturage kwirinda ibyaha muri rusange no gutanga amakuru ku gihe yatuma biburizwamo no gufata ababikoze.
Yabasabye kandi kuba ijisho ry’umuturanyi no gukaza amarondo kugirango barusheho kubirwanya no kubikumira.
Umuyobozi wa Sitasiyo ya Polisi ya Bwishyura, Inspector of Police (IP) Hitimana Kayiranga, yasobanuriye abo baturage ko ibiyobyabwenge biri ku isonga mu bitera ababinyoye gukora ibyaha birimo ubujura, gukubita no gukomeretsa, gufata ku ngufu, gusambanya abana, n’ihohoterwa rishingiye ku gitsina. Yakomeje abwira abaturage ko ibiyobyabwenge bigira ingaruka mbi ku babinyoye harimo kuba bahura n’uburwayi butandukanye ndetse n’amakimbirane yo mu ngo.
IP Hitimana Kayiranga yagize ati:"Ibiyobyabwenge iyo bifashwe birangizwa,bityo amafaranga aba yabiguzwe akaba apfuye ubusa. Ibyo bidindiza iterambere ry’uwabifatanywe. Ufashwe abinywa, abicuruza ndetse n’ubitunda arafungwa ,bishobora kwiyongeraho amande,bikaba bidindiza iterambere ry’uwabifatiwemo, iry’umuryango we, ndetse n’igihugu muri rusange, kuko iyo afunzwe yitabwaho kandi ntacyo akora. Niyo mpamvu buri wese akwiye kubyirinda no kugira uruhare mu kubirwanya."
Yashimiye bariya baturage ku bufatanye bwabo mu kurwanya no gukumira ibyaha, kandi abasaba kujya baha Polisi y’u Rwanda amakuru yatuma bikumirwa ndetse bikanarwanya.
