POLISI Y'U RWANDA

Kuri uyu wa 31 Nyakanga, mu cyumba cy’inama cy’akarere ka Karongi habereye ibiganiro byahuje abayobozi ba koperative zitwara ibinyabiziga mu ntara y’Iburengerazuba bigamije kubakangurira ubukangurambaga bwa ”Gerayo Amahoro”.

Aya mahugurwa yari afite insanganyamatsiko igira iti “Ubuyobozi bw’imakaza umutekano wo mu muhanda” akaba yarafunguwe n’umuyobozi wa Polisi mu karere ka Rutsiro Senior Superintendent of Police (SSP) Paul Butera ari kumwe n’umuyobozi w’ungirije w’akarere ka Karongi ushinzwe ubukungu n’iterembere ry’umuryango Bagwire Esperance.

Yitabiriwe n’abayobozi ba Koperative zitwara ibinyabiziga bagera kuri 54 baturutse muri koperative zitandukanye zikorera mu ntara y’Iburengerazuba (FERWACOTAMO, RITCO, RFTC)

Umuyobozi w’ungirije w’akarere ka Karongi ushinzwe ubukungu n’iterembere yabwiye abayobozi ba koperative gukurikiranira hafi abo bakoresha bakanabaha ibisabwa harimo n’ikiruhuko kugira ngo hirindwe izindi mpamvu zatera impanuka zo mumuhanda, nk’umunaniro mwinshi.

Yagize ati “Amagara arasesekara ntayorwa, gukumira impanuka zo mu muhanda bikwiye kuba inshingano za buri wese uwukoresha, mu rwego rwo kwirinda kubura ubuzima uzize impanuka wagizemo uruhare. Turasaba kandi gushyira ibinyabiziga byanyu mu bwishingizi kugira ngo n’ugize ikibazo abashe kwishyurwa.”

SSP Butera yabwiye abayobozi ba koperative zitwara ibinyabiziga ko kubungabunga umutekano wo mu muhanda bitareba Polisi gusa ahubwo nabo bakwiye kugira uruhare rugaragara mu kuwurinda.  

Yagize ati “Gusigasira no kubungabunga umutekano wo mu muhanda n’inshingano ya buri muntu wese uwukoresha ntabwo ari uwa Polisi gusa, ntibikwiye ko twumva  umuturage wahitwanwe n’impanuka kubera uburangare bw’utwaye ikinyabiziga, ubusinzi n’ibindi.”

Yongeyeho ko ubukangurambaga bwa “Gerayo Amahoro” Polisi n’abafatanyabikorwa babutangiye kugira ngo harwanywe impanuka zihitana ubuzima bw’abantu ndetse n’abakoresha umuhanda barusheho gusobanurirwa amategeko y’umuhanda.

SSP Butera yasabye abayobozi ba Koperative gukora kinyamwuga birinda gukoresha abakozi babo amasaha y’umurengera kuko byagiye bigaragara ko impanuka nyinshi ziba ziterwa n’umunaniro ukabije abatwara ibinyabiziga baba bafite.

Yabibukije ko bakwiye gukoresha ikoranabuhanga mu kazi kabo bashyira utugabanya muvuduko mu modoka zabo, ndetse na mubazi kuba motari, basabwe kandi gutanga ubutabazi bw’ibanze mu gihe bahuye n’impanuka.

Yasoje abasaba kwigisha bagenzi babo baje bahagarariye kwita no kubahiriza gahunda ya Gerayo Amahoro.

Polisi y’u Rwanda ihora  ikangurira buri wese ukoresha umuhanda kubahiriza amategeko n’amabwiriza biwugenga ndetse no kugira uruhare rwo gutanga amakuru k’uwariwe wese unyuranyije n’ayo mategeko.