Ku gicamunsi cyo kuri iki cyumweru tariki 11 Ugushyingo 2018 Polisi y’u Rwanda ikorera mu karere ka Kamonyi iri kumwe n’ubuyobozi bw’umurenge wa Nyamiyaga bitabiriye inama y’umugoroba w’ababyeyi bo mu murenge wa Nyamiyaga mu kagari ka Bibungo.

Ni inama yari yitabiriwe n’abaturage bagera kuri 500, Polisi yari ihagarariwe n’umupolisi ushinzwe guhuza ibikorwa byayo   n’abaturage hagamijwe kurwanya no gukumira ibyaha mu karere(DCLO) Chief Inspector of Police (CIP) Eugenie Uwimana.

Mu kiganiro yatanze yibanze ku gukangurira ababyeyi n’urubyiruko rwari muri uwo mugoroba w’ababyeyi kurwanya icyaha cyo gusambanya abana b’abakobwa  ndetse biviramo bamwe guterwa inda imburagihe cyangwa bakanduzwa indwara zindurira mu myanya ndangabitsina.

CIP Uwimana yakanguriye ababyeyi kwita ku burere bw’abana babo bakamenya ibibazo bafite ndetse bakanabaganiriza ku buzima bw’imyororokere, ababyeyi ntibabe ba terera iyo.

Yagize ati:”Hari ababyeyi usanga batajya begera abana babo cyane cyane abakobwa ngo babaganirize ku bibazo byo mu buzima bw’imyororokere ndetse ngo babagaragarize  urukundo.

CIP Uwimana yanagarutse kuri bamwe mu babyeyi barangwa n’imyitwarire mibi bigatuma abana babafatiraho urugero rubi.

“Hari bamwe mu babyeyi usanga birirwa mu businzi n’ubusambanyi,izo ngeso ni mbi kandi abana baba babireba bakabigana.Mugomba kujya mutanga ingero nziza ku bana banyu.”

Umunyamabanga mpuzabikorwa w’umurenge  wa Nyamiyaga, Mbonigaba Emmanuel yasabye ababyeyi kwirinda amakimbirane mu miryango.Abakangurira kujya bamenya ibyo abana bakeneye kugira ngo hatagira ubashukisha utuntu akabasambanya.

Yagize ati:”Umuryango uhora mu  makimbirane ntubona umwanya wo kwita ku bana ngo ubahe ibyo bakeneye, bigatuma abana bahora bifuza utuntu bigatuma abakobwa bashukwa  bakabasambanya bikabaviramo guterwa inda imbura gihe cyangwa bakanduzwa indwara.”

Abaturage kandi bakanguriwe gucika ku muco wo guhishira abasambanya abana b’abakobwa, basabwa kujya barega ababikoze bakabihanirwam,bibutswa ko ibihano kuwasambanyije umwana byiyongere bigera ku gufungwa burundu.Banasabwe kujya  bihutira kujyana abana kwa muganga igihe cyose hari  

Ababyeyi bagaragaje ko bishimiye ibiganiro bahawe biyemeza kwikosora bakegera abana babo cyane abakobwa bakabaganiriza kenshi, bakamenya ibibazo bahura nabyo buri munsi.

Raporo ziheruka gukorwa mu mirenge igize akarere ka Kamonyi zigaragaza ko mu myaka ibiri(2) ishize abakobwa bagera kuri  370 bari munsi y’imyaka 18 basambanyijwe bagaterwa inda imbura gihe.