Kinyarwanda
English
Urubyiruko rw’abanyeshuri ruhagarariye abandi ruri mu mwiherero w’iminsi itanu mu kigo cya Happiness Ibibondo giherereye mu murenge wa Runda mu karere ka Kamonyi, rwasabwe kuba umusemburo w’impinduka nziza rukumira inda ziterwa abangavu, ibiyobyabwenge, ihohoterwa n’ibindi byaha bitandukanye.
Uru rubyiruko rw’abanyeshuri bagera kuri 45 rwabisabwe n’umupolisi ushinzwe uburere mboneragihugu no guhuza ibikorwa bya Polisi n’abaturage mu karere ka Kamonyi,Chief Inspector of Police (CIP) Eugénie Uwimana mu kiganiro yagiranye nabo mu ntangiriro z’iki cyumweru.
Uyu mwiherero uhuje abanyeshuri bahagarariye abandi mu mashuri yisumbuye bigaho, baturutse mu karere ka Kamonyi. Bakaba ari n’abayobozi b’amatsinda y’abanyeshuri(Clubs) agamije kurwanya ibyaha. Ni umwiherero wateguwe n’urubyiruko rukora mu karere ka Kamonyi ruhuriye mu muryango witwa ELIM(Effective Leaders Inheritance Mission) uhagarariwe na Nshimiyimana Ephrem.
Mu kiganiro cya CIP Uwimana yasabye aba banyeshuri kurwanya no kwirinda ibyaha bitandukanye byatuma batagera ku ntego zabo nziza biyemeje.
Yagize ati: “Turabasaba kurangwa n’indangagaciro z’umuco nyarwanda mwirinda ibibarangaza byatuma mudakurikira amasomo yanyu uko bikwiye. Umunyeshuri mwiza arangwa n’ikinyabupfura akubaha abamurera n’undi wese umugira inama nziza zimufasha kugera ku ntego yihaye.”
Yabwiye abo banyeshuri ububi n’ingaruka z’ibiyobyabwenge abakangurira kubyirinda no kugira uruhare mu kubirwanya.
Ati: “Ibiyobyabwenge nk’uko bivugitse, byangiza kandi biyobya ubwenge, ndetse ntimwashobora gukurikira amasomo yanyu ngo mutsinde mu ishuri cyangwa ngo mutere imbere muramutse mubikoresha. Mwebwe muhagarariye urundi rubyiruko rw’abanyeshuri murasabwa kurukangurira kubirwanya no gutanga amakuru y’ababikoresha mu binyujije mu matsinda(Clubs) muhuriramo ku mashuri mwigaho.”
Yakomeje abakangurira kurwanya no kwirinda inda ziterwa abangavu ndetse no kurwanya uwo ariwe wese wabashukisha impano zitandukanye agamije kubashora mu busambanyi.
Nshimiyimana Ephrem yabasabye kurwanya ihohoterwa iryo ariryo ryose kuko ribagiraho ingaruka zitandukanye zishobora no gutuma batagera ku ntego bihaye. Yabagaragarije ko kugira ngo ibi byose babashe kubirwanya no kubyirinda barushaho gushyira imbaraga mu matsinda yo kubirwanya.
