Kinyarwanda
English
Mu gihe abanyarwanda turi mu cyumweru cyo kwibuka ku nshuro ya 21 Jenoside yakorewe abatutsi, Polisi y'u Rwanda ikomeje guhura n'abaturage bibumbiye mu mashyirahamwe atandukanye bagakangurirwa kugira uruhare mu gufasha abacitse ku icumu.
Kuri uyu wa kane tariki ya 9 Mata, Polisi y'igihugu ihagarariwe n'umuyobozi wa Polisi mu karere ka Kamonyi Superintendent of Police (SP) Hamza Vita yagiranye ikiganiro n'abamotari bibumbiye mu mashyirahamwe KAMOTRACO na KOSTAMOCA.
Muri iki kiganiro, SP Hamza yasabye aba bamotari kwitabira gahunda y'ibiganiro biri gutangwa muri iki gihe twibuka ku nshuro ya 21 Jenoside yakorewe abatutsi mu 1994, bakita ku mutekano wabo n'uw'aho batuye muri ibi bihe.
Akaba yagize ati: "Buri wese agomba kugira uruhare mu kubumbatira umutekano w'abaturage bose kandi umutekano uza mbere y'ibindi byose kuko nta kintu ushobora kugeraho udafite umutekano, yashimangiye ko mu gihe cyo kwibuka umutekano ugomba kurushaho kwitabwaho. Turabasaba ko mwita ku mutekano muri ibi bihe turimo, twirinde ingengabitekerezo ya Jenoside n'imvugo zisesereza, tube aba mbere mu kurinda umutekano w'abarokotse Jenoside n'inzibutso ziri mu karere kacu".
Yakomeje abasaba kwirinda impanuka zituruka ku burangare cyangwa zatewe n'abatwara ibinyabiziga banyoye ibiyobyabwenge, kandi agaruka ku bamotari batwara abagenzi bafite ibiyobyabwenge cyangwa babitwara ubwabo.
Nyuma y'ibi biganiro, umwe muri abo bamotari witwa Nkurunziza Benjamin yavuze ko bagiye gushyira mu bikorwa inama bagiriwe na Polisi y'u Rwanda, aho yagize ati:"Abamotari muri ibi bihe dukwiye kwirinda amagambo akomeretsa, tugiye kwishyira hamwe turebe uwarokotse turemera kuko dufite n'imbaraga nk'urubyiruko".
Yavuze kandi ko batazihanganira umunyamuryango wo mu mashyirahamwe yabo uzarangwa n'ingengabitekerezo ya jenoside.
Yasoje avuga ko bagiye kurushaho gutangira amakuru ku gihe birinda icyahungabanya umutekano wabo n'uw'aho batuye.
