Kinyarwanda
English
Abatwara abagenzi kuri moto bakorera mu karere ka Kamonyi bibumbiye muri Cooperative des Chauffeurs des Taxis Moto de Kamonyi ( COCTAMOKA) bakanguriwe kuba abafatanyabikorwa mu gukumira impanuka zo mu muhanda; birinda icyatuma bayikora cyangwa bakayiteza.
Ibi babisabwe ku itariki 17 z’uku kwezi mu nama bagiranye n’Umuyobozi wa Polisi muri aka karere, Superintendent of Police (SP) Marc Minani; ikiganiro yagiranye na bo kikaba cyaribanze ku ruhare rwabo mu gukumira impanuka.
Mu butumwa yabagejejeho, SP Minani yababwiye ati,"Turishimira ko bamwe mu bamotari bahinduye imyumvire n’imyitwarire haba mu kugabanya umuvuduko, kwambara ingofero zabugenewe (Casques); ibi bikaba biri ku isonga mu biteza impanuka zo mu muhanda."
Yababwiye ko kubahiriza amategeko y’umuhanda ari ukurengera ubuzima bw’abakoresha umuhanda; bityo ko biri mu nyungu zabo kuyubahiriza kuko na bo bashobora guhitanwa cyangwa bagakomeretswa n’impanuka."
Yagize ati," Mujye muhwitura bagenzi banyu batubaha amategeko kuko iyo umumotari atendetse cyangwa agatwara umugenzi utambaye ingofero, agahindura icyerekezo atabanje kureba aho ajya aba asiga umwuga wanyu icyasha."
SP Minani yababwiye kandi ati, "Mu kazi kanyu ko gutwara abagenzi kuri moto muhura n’abantu benshi kandi bafite imigambi itandukanye. Igihe mwumvise amakuru yerekeranye n’ikintu cyahungabanya umutekano mukwiriye kwihutira kubimenyesha inzego z’umutekano kugira ngo gikumirwe."
Yabibukije ko bagomba guhagarara igihe cyose bahagaritswe n’Umupolisi cyangwa undi muntu ubifitiye ububasha, kwambara umwambaro ubaranga igihe cyose barimo gukora iyi mirimo yo gutwara abagenzi, kandi bagahagurutsa moto umugenzi amaze kuyambara neza.
Umuyobozi wa COCTAMOKA, Mukurajabo Jean Claude yabwiye bagenzi be ati,"Ntitugomba gutwarwa umutima n’amafaranga ngo twibagirwe ko umutekano usesuye dufite mu gihugu cyacu ari wo utuma dukora nta nkomyi iyi mirimo idutunze ikanadutungira imiryango. Turasabwa kugira uruhare mu kuwusigasira twirinda ibyaha aho biva bikagera; kandi duha Polisi n’izindi nzego zibishinzwe amakuru atuma bikumirwa no gufata ababikoze."
Yasabye bagenzi be kubahiriza amategeko y’umuhanda, anizeza Polisi ubufatanye mu kurwanya no gukumira ibyaha byaba ibifitanye isano n’imirimo bakora yo gutwara abagenzi kuri moto ndetse n’ibindi byaha muri rusange.
