Kinyarwanda
English
Ku cyicaro gikuru cya Polisi y'u Rwanda ku Kacyiru, kuri uyu wa Mbere tariki ya 20 Nyakanga, Umuryango uhuza abayobozi bakuru ba Polisi bo mu Karere ka Afurika y’Iburasirazuba (EAPCCO), ku bufatanye n’Umushinga w’Umuryango w’Ubumwe bw’u Burayi wo kurwanya ibyaha byateguwe n’iterabwoba (EU-ACT), watangije amahugurwa y’iminsi ine yo ku rwego rw’Akarere agamije kongerera ubumenyi abashinzwe kubahiriza amategeko mu gukora iperereza ku byaha bifitanye isano n’ikoranabuhanga kw' ikorwa ry’amakuru yihererekanywa (Blockchain) ku ifaranga koranabuhanga (Cryptocurrency).
Aya mahugurwa yahuje abashinzwe kubahiriza amategeko baturutse mu bihugu bigize umuryango wa EAPCCO, hagamijwe kubongerera ubushobozi mu gukora iperereza ku byaha bikorwa hifashishijwe ikoranabuhanga ku ifaranga koranabuhanga bikomeje kwifashishwa n’imitwe y’abanyabyaha bakora mu buryo bwateguwe.
Mu muhango wo gufungura aya mahugurwa, Umuyobozi Mukuru wa EAPCCO akaba n’Umuyobozi w’ibiro bya Polisi Mpuzamahanga (Interpol) mu karere ka Afurika y’Iburasirazuba, Apollo Africa Sendahangarwa, yavuze ko aya mahugurwa agaragaza icyerekezo cya EAPCCO cyo gukomeza kubaka ubushobozi bw’akarere binyuze mu guhugurana no gukorera hamwe, hagamijwe kurwanya ibyaha byambukiranya imipaka.
Yagize ati: “Aya mahugurwa yateguwe binyuze mu bufatanye dufitanye n’Umushinga wa EU-ACT, kandi ari mu murongo w’icyerekezo cya EAPCCO cyo guhugurirwa hamwe kugira ngo twubake ubushobozi rusange bwo gutahura, gukora iperereza no kurwanya ibyaha byambukiranya imipaka bikorwa n’imitwe y’abanyabyaha.”
Yakomeje avuga ko aya mahugurwa yiyongera ku bindi bikorwa EAPCCO isanzwe ikora birimo iperereza rihuriweho, ibikorwa n’imyitozo itandukanye bihuriweho, ashimangira ko ubumenyi abayitabiriye bazungukiramo buzagira uruhare rukomeye mu guhangana n’imitwe y’abanyabyaha igenda irushaho gukoresha uburyo bw’uburyarya n’amayeri ahanitse.
Apollo yashimiye kandi umushinga wa EU-ACT ku bufatanye ukomeje gutanga, anashishikariza abitabiriye amahugurwa gukoresha neza ayo mahirwe kugira ngo bongere ubumenyi bwabo mu bya tekiniki ndetse banagure umuyoboro w’imikoranire mu kazi.
Peter Karake, Umuyobozi Mukuru ushinzwe iperereza ku byaha no kurwanya iterabwoba mu Rwego rw'Igihugu rw'Ubugenzacyaha (RIB), akaba n’umuyobozi wa Komite ya EAPCCO ishinzwe iperereza ku byaha, yavuze ko iyi gahunda iri mu ngamba z’igihe kirekire zigamije kubaka abashinzwe iperereza mu muryango wa EAPCCO.
Yagize ati: “Aya mahugurwa si igikorwa gisanzwe ahubwo ni intambwe imwe muri gahunda yateguwe kandi yubatswe mu byiciro byose by’umuryango, igamije kubaka abashinzwe iperereza kuba inzobere ndetse bafite ubushobozi bwo guhangana n’ibyaha bikorwa hifashishije ifaranga koranabuhanga muri iki gihe.”Yakomeje avuga ko aya mahugurwa yubakiye ku mahugurwa y’ibanze yabereye i Nairobi muri Kenya mu Ukuboza 2025, aya akaba ari icyiciro cya kabiri muri gahunda y’ibyiciro bitatu, izasozwa n’amahugurwa yo ku rwego rwo hejuru azibanda ku micungire y’amadosiye y’iperereza akorwa mu bihugu byinshi no ku buryo bwihariye bwo guhuza ibimenyetso bya gihanga (forensic).Ati: “Aya mahugurwa yo ku rwego rwisumbuyeho azafasha abayitabiriye kurushaho kunoza ubushobozi bwo gusesengura amakuru, gukoresha neza uburyo bw’iperereza bushingiye ku bikorwa bifatika no kongera icyizere mu gukemura imanza z’iperereza zikomeye kandi zigoranye.”Aya mahugurwa arimo gutangwa n’inzobere zaturutse mu gihugu cy' u Butaliyani (Carabinieri) mu ishami rishinzwe iperereza ku byaha bifitanye isano n’ifaranga koranabuhanga, ku bufatanye n’Umushinga wa EU-ACT ndetse n’ubunyamabanga bukuru bwa EAPCCO.
