Kinyarwanda
English
Abapolisi 28 bashinzwe ubufatanye hagati ya Polisi y’u Rwanda,abaturage ndetse n’izindi nzego mu gukumira no kurwanya ibyaha (DCLOs) bari kumwe n’urubyiruko 64 rw’abakorerabushake mu gukumira ibyaha bari mu mwiherero wo kunoza inshingano zabo.Uyu mwiherero uzamara iminsi itatu watangiye kuwa gatanu tariki ya 12 Ukuboza.
Atangiza uyu mwiherero ku mugaragaro,Umuyobozi mukuru wa Polisi y’u Rwanda IGP Emmanuel K Gasana yasabye abari muri uwo mwiherero kugira imyitwarire myiza mu kazi kabo yatuma batekereza birushijeho, bityo bakagira imyumvire imwe ituma bashyira mu bikorwa gahunda yabo yo guhuriza hamwe imbaraga mu gukumira no kurwanya ibyaha.
IGP Emmanuel K Gasana yakomeje asaba by’umwihariko urwo rubyiruko rw’abakorerabushake mu gukumira no kurwanya ibyaha kujya bakora isuzuma kenshi ry’ibikorwa byabo, hagamijwe kureba ko intego biyemeje ndetse n’icyerekezo cy’ibikorwa byabo bigerwaho.
Mufuruki Fred, umuyobozi mukuru muri Minisiteri y’ubutegetsi bw’igihugu ushinzwe imiyoborere no guhuza inzego z’ibanze, mu kiganiro yabagejejeho kirebana n’uruhare rw’urubyiruko mu miyoborere myiza,yavuze ko imiyoborere myiza ariyo nkingi y’ibyiza bibereye abanyarwanda kandi bagezeho.Yagarutse ku ruhare rw’urubyiruko avuga ko rufite uruhare ruini mu kurinda ibyo byiza byagezweho.
Perezida wa Komisiyo y’igihugu y’ubumwe n’ubwiyunge (NURC), Bishop John Rucyahana we yagiranye ikiganiro n’abari mu mwiherero, aho yabaganirije ku kamaro ka gahunda ya ndi umunyarwanda. Bishop John Rucyahana yavuze ko gahunda ya ndi umunyarwanda ari uburyo umunyarwanda wese akwiye kwiyumvamo bwo gukunda igihugu,abaturage no kugira umuco n’indangagaciro nyarwanda zituma habaho za kirazira zatuma igihugu cyacu gitera imbere.yakomeje avuga ko iyi gahunda inagamije kwigira ku mateka y’u Rwanda hagamijwe gukuramo amasomo azadufasha kugira icyerekezo cyiza cy’u Rwanda.
Abari muri uyu mwiherero bahawe n’ibiganiro ku ruhare rw’ubukorerabushake mu migendekere myiza y’amatora abaye mu mucyo no mu bwisanzure,uruhare rwa community policing mu gukumira ibyaha,gukoresha imbuga nkoranyambaga mu kubungabunga umutekano,imikorere y’ihuriro ry’urubyiruko rw’abakorerabushake mu gukumira ibyaha n’ibindi.
