POLISI Y'U RWANDA

Umuyobozi Mukuru wa Polisi Wungirije ushinzwe ibikorwa (DIGP) Vincent Sano, kuri uyu wa Kane tariki ya 7 Werurwe 2024, yakiriye itsinda ry'intumwa zihagarariye imiryango itatu yo mu Karere, zasuye Polisi y'u Rwanda hagamijwe gusangira ubunararibonye mu bijyanye no kurwanya iterabwoba.

Izi ntumwa zari ziyobowe na Chief Superintendent of Police (CSP) Africa S. Apollo, uyobora umuryango uhuza Polisi Mpuzamahanga (Interpol) mu Karere, ufite icyicaro i Nairobi mu murwa mukuru wa Kenya, akaba n'Umuyobozi w'umuryango uhuza abayobozi bakuru ba Polisi muri Afurika y'Iburasirazuba (EAPCCO), wari kumwe n'abakozi b'ikigo cy'icyitegererezo cya EAPCCO mu kurwanya iterabwoba n'ab'Ikigo Cyigenga cy' Ubushakashatsi ku mutekano (ISS).

Uruzinduko rwari rugamije kwigira ku mateka y'u Rwanda mu bikorwa byo kurwanya iterabwoba mu Ntara ya Cabo Delgado mu gihugu cya Mozambique ku nyungu z'ibihugu bigize umuryango wa EAPCCO.

Mu biganiro bagiranye, DIGP Sano yashimangiye ubushake, kwiyemeza no gufatanyiriza hamwe nk'intwaro yo guhangana n'ibibazo by'umutekano mu Karere by'umwihariko ibitero by'imitwe y'iterabwoba.

Yagize ati: "Iterabwoba rikomeje kuba ikibazo gikomeye ku mutekano w'ibihugu byo mu Karere n'imiryango ihuza ibihugu. Ibi biganiro ni umwanya mwiza wo kwigira hamwe uko iterabwoba rihagaze no gufata ingamba zo kurushaho guhangana naryo."

Yakomeje ati: "Kugira ngo tubashe gukemura ibibazo biterwa n'iterabwoba aho abantu bicwa, imiryango ikazima, abaturage bagatatana, biradusaba kurenga imbibi zidutandukanya nk'ibihugu tugashyira hamwe imbaraga mu kurirwanya."

"Dushyize hamwe, haboneka umuti,ubunararibonye n'imbaraga ziturutse ku bufatanye, iby'ibanze mu guhangana n'iki kibazo."

DIGP Sano yagarutse ku bikorwa bya Polisi y'u Rwanda mu kurwanya iterabwoba ry'umutwe wa Ansar Al Suna muri Mozambique.

Yavuze ati: "Ibikorwa by'u Rwanda byo kurwanya iterabwoba mu Ntara ya Cabo Delgado kuva mu mwaka wa 2021, ku bufatanye n'inzego z'umutekano za Mozambique bigaragaza akamaro ko guhuriza hamwe ingamba zo kurwanya iterabwoba, hatirengagijwe n'uruhare rw'ubufatanye n'abaturage, gusangira amakuru no kubaka ubushobozi, bikanagaragaza ko gufatanyiriza hamwe ari byo bikenewe mu gutsintsura umuzi w'ibibazo by'ingutu birimo ubukene, ivangura n'ubusumbane bukabije.

CSP Africa, uyobora Interpol mu Karere, mu ijambo rye, yavuze ko amateka meza y'ibihugu bigize umuryango ari amahirwe afasha mu myiteguro, amahugurwa n'ishyirwa mu bikorwa ry'ingamba zo kurwanya iterabwoba no gutuma akarere gatekana.

Assistant Inspector General of Police (AIGP) John Ndungutse, Umuyobozi w'ikigo cy'icyitegererezo cya EAPCCO cyo kurwanya iterabwoba yavuze ko ubudasa bw'u Rwanda n'ibikorwa byarwo mu kurwanya iterabwoba mu Ntara ya Cabo Delgado bitanga amahirwe yo kubaka ubushobozi no guhuza imbaraga  z'ibihugu mu kubumbatira amahoro n'umutekano mu Karere.