Kinyarwanda
English
Abayapani 9 b’inzobere mu ikoranabuhanga bakomoka mu gihugu cy’ubuyapani bakorera sosiyete yitwa Nippon Electric Company ltd (NEC), kuri uyu wa mbere tariki ya 12 basuye icyicaro gikuru cya Polisi y’u Rwanda ku Kacyiru.
Aba bashyitsi bakaba bakiriwe n’umuyobozi mukuru wa Polisi y’u Rwanda IGP Emmanuel K. Gasana n’abandi bapolisi bakuru.
Mu ijambo rye, IGP Gasana yifurije ikaze aba bashyitsi, anavuga ko uruzinduko rwabo rwerekana imikoranire myiza hagati ya Polisi y’u Rwanda na sosiyete yabo.
Yabasobanuriye ko Polisi y’u Rwanda ifite gahunda yo gukwirakwiza ibikoresho by’ikoranabuhanga kuri buri sitasiyo yo mu gihugu, ku buryo bizabafasha guhanahana amakuru ku buryo bwihuse, bityo abakekwaho ibyaha bagatabwa muri yombi mu gihe gito.
Umuyobozi wungirije w’iyi sosiyete akaba ari nawe uyoboye iri tsinda Miwa Toru, yatangaje ko yashimishijwe n’urwego Polisi y’u Rwanda imaze kugeraho ku byerekeranye no kugenza ibyaha hifashishijwe ikoranabuhanga.
Toru akaba yijeje Polisi y’u Rwanda kuzakomeza gukorana nayo no gukomeza kuyitera inkunga kugirango ishobore kugenza ibyaha bikorwa hifashishijwe ikoranabuhanga n’ibindi byaha bitandukanye.
