POLISI Y'U RWANDA

Kuri uyu wa gatatu taliki ya 29 Nyakanga 2015, itsinda ry’impuguke 12 ziturutse mu gihugu cya Centrafica, zasuye ishami rya Polisi y’u Rwanda rishinzwe gufasha abakorewe ihohoterwa rishingiye ku gitsina n’irikorerwa abana ari ryo Isange One Stop Center ribarizwa mu bitaro bya Polisi y’u Rwanda,ndetse n’ishami rishinzwe kurwanya ihohoterwa rishingiye ku gitsina muri Polisi y’u Rwanda, maze bishimira iyi gahunda bavuga ko ari "uburyo budasanzwe bwo guha icyizere abagore n’abana."

Ni itsinda rigizwe n’abanyamategeko, abapolisi, abajandarume ndetse n’impuguke mu by’imibereho y’abaturage bo mu gihugu cya Centrafrica, baherekejwe n’impuguke mu mategeko zikora mu butumwa bwa Loni bwo kubungabunga amahoro muri iki gihugu(MONUSCA), ari nabo baterankunga ba ziriya nzego muri iki gihugu.

Abasobanurira imikorere y’ikigo Isange One Stop Center, Inspector of Police (IP) Charles Rwego, umuyobozi w’ishami rishinzwe ubuzima bwo mu mutwe muri iki kigo,  yavuze ko Isange One Stop Center ari rimwe mu mashami agize ibitaro bya Polisi y’u Rwanda, yabaye igisubizo mu gufasha abakorewe ihohotwerwa rishingiye ku gitsina n’irikorerwa abana.

Yagize ati: "Isange yubatse ku buryo serivisi kuva ku buvuzi, n’ubujyanama, harimo ubujyanye n’amategeko, zitangirwa hamwe kandi  ku buntu, ariko kandi, iri shami ryagize izindi gahunda nko gukangurira abaturage kugira uruhare mu kurwanya ihohoterwa rishingiye ku gitsina n’irikorerwa abana."

Yagize kandi ati: " Ubu abantu  ntibagihisha ihohoterwa ryabakorewe. Ibyo bituma bahabwa ubufasha mu maguru mashya burimo ubuvuzi n’ubutabera."

Nyuma yo gusobanurirwa  serivisi zitangirwa muri Isange One Stop Center, Bwana Etienne Koyague,umuyobozi w’ibiro muri Minisiteri y’Ubutabera muri Centrafrica ari nawe wari uyoboye izi mpuguke,   yashimye guverinoma y’u Rwanda ku ngamba zo guharanira uburenganzira bw’abagore, abakobwa  n’abana.

Yagize ati: "Ibi ntibisanzwe kandi n’urundi rugero rw’uko u Rwanda rubayeho binyuze  mu kwerekana no gutanga urugero rwiza."

Ati," Mukwiye gushimirwa ibitekerezo n’ubufatanye byabaranze mu  gushyira mu bikorwa izi gahunda ku nzego zose no gutuma zigerwaho. Ndahamya ko zagiriye  umumaro abaturage b’u Rwanda n’ananyafurika muri rusange, cyane cyane abaza kubigiraho hano, ibyo kandi natwe nibyo byatuzanye, nyuma y’uko igihugu cyacu gikubutse mu bibazo by’intambara.”

Koyague yagize ati, “Iki ni igihamya cy’intego  ya Nyakubahwa Jeanette Kagame, yo kurwanya ihohoterwa rishingiye ku gitsina n’irikorerwa abana, hibandwa ku buzima, uburezi no guteza imbere abaturage." Yagize kandi ati:"Ibi bikwiye mu by’ukuri gushimwa kandi twishimiye kugera mu Rwanda tukaba tunizera ko tuzagirana ubufatanye bukomeye mu myaka iri imbere."

Iki kigo (Isange) cyashyizweho muri 2009, ku bufasha bwa Nyakubahwa Madame wa Perezida, Jeanette Kagame, n’Ihuriro ry’Amashami y’Umuryango w’Abibimbye akorera mu Rwanda (One UN).