POLISI Y'U RWANDA

Ku mugoroba wo kuri uyu wa Kane tariki ya 29 Mutarama, Umuyobozi Mukuru wungirije wa Polisi y'u Rwanda (DIGP), ushinzwe ubutegetsi n'abakozi, DCG Jeanne Chantal Ujeneza, yakiriye  ku cyicaro gikuru cya Polisi ku Kacyiru, itsinda ry'intumwa zo mu gihugu cya Namibia ziri mu ruzinduko rw'akazi mu Rwanda.

Ni itsinda ry'abadepite 12 bagize Komisiyo ishinzwe Ububanyi n’amahanga, Ingabo n’umutekano mu Nteko Ishinga Amategeko ya Namibia, uruzinduko rwabo rugamije kungurana ubumenyi n’ubunararibonye ku bijyanye n'ingamba n’amabwiriza bijyanye n'ububanyi n’amahanga, kurinda ubusugire bw'igihugu n’umutekano muri rusange.

DCG Jeanne Chantal Ujeneza, yabasobanuriye uko u Rwanda ari igihugu gifite umutekano ugaragarira buri wese biturutse ku buyobozi bw'icyerekezo butanga umurongo ufatika wo guharanira ko abanyarwanda bakora imirimo yabo ntacyo bishisha.

DCG Ujeneza yagize ati: “Tugendeye ku cyerekezo igihugu cyacu gifite cyo guharanira ko abanyarwanda n’abaturarwanda bakora ibikorwa byabo batekanye, twihutiye kuvugurura imikorere hibandwa ku gukumira ibyaha n'impanuka zo mu muhanda binyuze mu bufatanye n’abaturage mu kwicungira umutekano hagamijwe kugabanya impanuka n'ibyaha muri rusange.’’

Yakomeje agira ati: “Benshi mu rubyiruko bagira uruhare mu gukumira ibyaha, aho kuri ubu abarenga miliyoni ebyiri bagize ihuriro ry’urubyiruko rw’abakorerabushake mu gukumira no kurwanya ibyaha, hashinzwe kandi n'amatsinda yo kurwanya ibyaha cyane mu mashuri yisumbuye, hashyirwaho imboni z’impinduka zigizwe n’abanyuze mu bigo ngororamuco, ibyo byose bigaragaza ko umubare munini w’urubyiruko utagira uruhare mu byaha ahubwo wiyemeje guharanira umutekano w’igihugu na gahunda z’iterambere.”

Uhagarariye itsinda ry’abadepite baturutse muri Namibia Hon. James Unomasa yashimye Polisi y’u Rwanda ku buryo bugezweho ikoresha mu gucunga umutekano w’abaturarwanda ndetse n’ibyabo by'umwihariko Ishami rishinzwe umutekano wo mu muhanda, aboneraho no kugaragaza ko ibyo bigishijwe n’ibyo babonye babikuyemo isomo rikomeye rizabafasha mu kunoza no gucunga umutekano mu gihugu cyabo.

Polisi y'u Rwanda n'iya Namibia zasinye amasezerano y'ubufatanye mu mwaka wa 2015 bwibanda cyane ku bijyanye n'ubufatanye mu byo gucunga umutekano, kubaka ubushobozi, amahugurwa ahuriweho no guhanahana amakuru.