POLISI Y'U RWANDA

Ishuri ry’imyuga rya Gishari (Gishari Polytechnic - GIP) ryatangije porogaramu nshya y’ubuhinzi izafasha gukoresha uburyo bugezweho mu guhinga hakoreshejwe imashini mu rwego rwo kongera umusaruro.

GIP ni ishuri ry’imyuga, akaba ari igice kimwe cy’ishuri rya polisi rya Gishari (Police Training School -PTS) riri mu Karere ka Rwamagana, iryo shuri ry’imyuga ryashyizweho mu bufatanye n’umuryango wa WDA (Workforce Development Authority), mu rwego rwo guteza imbere, koroshya iterambere hongerwa ubumenyi n’ubushobozi ku rwego rw’igihugu. Iryo shuri ryigisha abapolisi n’abasivili mu rwego rwo kubategurira gupigana ku isoko ry’umurimo.

Guverinoma yashyizeho gahunda y’amasomo yigisha y’ubuhinzi bw’iterambere bukoresheje amamashini muri iryo shuri mu rwego rwo guteza imbere ubuhinzi no kongera umusaruro.

Assistant Commissioner of Police (ACP) Sam Karemera, ukuriye iryo shuri, yagaragaje ko iyi porogaramu nshya igamije guteza imbere abahinzi bahabwa amahirwe yo kubona ubumenyi bwo gukoresha amamashini akoreshwa mu buhinzi.

Yakomeje asobanura ati: “twatangiye guhugura abanyeshuri bacu tubaha ubumenyi kw’iterambere ry’ubuhinzi. Twabonye ibikoresho by’ubuhinzi cyane cyane amamashini ahinga azakoreshwa mu kwigisha abahinzi uburyo bugezweho bwo guhinga”.

“Amamashini menshi aparitse ku turere nta kintu akoreshwa kubera kubura abantu bafite ubushobozi bwo kuyakoresha cyangwa kuyakora mu gihe yagize ikibazo. Tugeze mu gihe cyo kurangiza iri pfushabusa”.

Yongeyeho ati: “aya masomo mashya y’ubuhinzi bukoresheje amamashini buzafasha abayitabiriye cyangwa amashyirahamwe y’abahinzi kugira ubumenyi n’ubushobozi bwo gukoresha ayo mamashini”.

Minisitiri w’ubuhinzi aherutse mu gihe gishize cya vuba gushyiraho ikigo cy’ubuhinzi bukoresheje amamashini ahinga.

Iki kigo cyahawe ibikoresho bitandukanye by’ubuhinzi birimo amamashini ahinga, amamashini akurura andi ahinga, amamashini akurura amazi, asarura n’andi atandukanye.

Iri shuri kandi ryahawe imashini (Hydraform) ifite ubushobozi bwo kubumba amatafari 3000 ku munsi izifashishwa mu kongera amazu y’ishuri rya GIP.

Intego nyamukuru ya GIP ni ugushaka umuti ku rwego ruhanitse ku bijyanye n’iterambere ry’ubushobozi mu buhinzi bwa kijyambere mu rwego rwo kuzahura ubukungu.

Iri shuri ritanga imyamyabushobozi mu yindi myuga ku bapolisi n’abasivili mu gukora iby’amazi, amashanyarazi, ubwubatsi, ikoranabuhanga, ubukanishi n’ubundi bushobozi butandukanye.

Uyu munsi GIP yigamo abanyeshuri bagera kuri 600 muri bo 350 bakaba bari ku rwego rwisumbuye naho abandi bakaba bigishwa imyuga.