POLISI Y'U RWANDA

Ngo ubushake bwa Politiki bwo kurwanya ruswa bugaragazwa na Polisi y’u Rwanda ndetse n’igihugu cy’u Rwanda muri rusange,  bikwiye kubera urugero ibindi bihugu byo mu karere n’ahandi, ukurikije ibimaze kugerwaho muri urwo rwego.

Ibi ni ibitangazwa n’intumwa ebyiri zivuye mu kigo kirwanya ruswa mu gihugu cya Zanzibar cyitwa Zanzibar Anti-corruption and Economic crimes Athority(ZAECA)  mu rugendoshuri rw’iminsi ine zirimo kugirira mu Rwanda , ubwo zasuraga Polisi y’u Rwanda kuri uyu wa kabiri taliki ya 28 Werurwe, ku cyicaro gikuru cyayo cyiri ku Kacyiru.

Ubwo zasuraga Polisi y’u Rwanda, zakiriwe n’umuyobozi w’ishami rishinzwe imikoranire ya Polisi n’abaturage muri gahunda yo gukumira no kurwanya ibyaha muri Polisi y’u Rwanda, Assistant Commissioner of Police(ACP) Celestin Twahirwa, ari kumwe n’Umuvugizi mukuru wa Polisi wungirije, Chief Superintendent of Police(CSP) Lynder Nkuranga.

Mu kiganiro yahaye izi ntumwa, ACP Twahirwa yabasobanuriye birambuye uburyo Polisi ikoresha mu kurandura umuco wa ruswa mu nzego za Polisi ndetse no mu gihugu muri rusange.

Yatangiriye ku moko ya ruswa, agaragariza izi ntumwa ingaruka ruswa igira ku iterambere ry’igihugu ndetse ishegesha umuryango w’abatuye igihugu cyayihaye intebe, aho yagize ati:”Ruswa nikimwe mu biranga intege nke z’ubutegetsi, ni  imbogamizi ikomeye ku butabera ahubwo ikaba icyanzu cy’akarengane n’umuco wo kudahana, imunga ubukungu bw’igihugu kuko nta misoro itangwa bityo Leta ikahahombera; kandi nta cyizere abashoramari n’abaterankunga baba bagifitiye igihugu cyokamwe na ruswa.”

ACP Twahirwa yagaragaje ko ruswa ari imbogamizi ikomeye ku miyoborere myiza, maze aboneraho gusobanurira izi ntumwa ko inzego zose mu Rwanda zifata ruswa nk’ikintu kitihanganirwa, ari nawo muco ukomeje kwigishwa ku nzego zose.

ACP Twahirwa yavuze ko Polisi y’u Rwanda nayo ikataje muri gahunda yo kurwanya ruswa, aho yanashyizeho uburyo butandukanye aho yashyizeho umutwe wihariye wo kuyirwanya ubarizwa mu ishami ngenzuramurimo ukora amasaha yose, yashyizeho kandi undi mutwe urwanya inyerezwa ry’ibya rubanda ubarizwa mu bugenzacyaha bwa Polisi y’u Rwanda, hakaba kandi n’umutwe ushinzwe imyitwarire y’abapolisi.

Mu bindi, ACP Twahirwa yabasobanuriye ku bufatanye bwa Polisi y’u Rwanda n’izindi nzego cyane cyane n’abaturage mu gukumira no kurwanya ruswa, uburyo butandukanye ikoresha mu kugeza ubutumwa bwo kurwanya ruswa ku baturage ndetse n’uburyo bukoreshwa mu kwigisha no kugira abapolisi abanyamwuga ndetse no guca intege inzira zose baboneramo ruswa kandi avuga ko zitanga umusaruro.

Rashid Said ushinzwe iperereza muri ZAECA  mu ijambo rye, yashimye ibyagezweho muri Polisi y’u Rwanda no mu Rwanda by’umwihariko, maze avuga ko ari ibyo.

Yagize ati:” Biragaragara ko kugira ngo izi nzego zose zirwanya ruswa zigere ku nshingano zazo ari uko zishyigikiwe n’ubushake bwa Politiki buri mu Rwanda, ni ikintu cyiza ibindi bihugu bikwiye kwigira ku Rwanda .”

Rashid yavuze ko u Rwanda rwamenye kare ububi bwa ruswa maze rufatira  ingamba ku gihe, kuko ahandi henshi inzego zirwanya ruswa zigitangira bityo zigifite byinshi byo gukora ngo zigere nk’aho izo mu Rwanda zigeze aho yongeyeho ati:” Nta myaka myinshi ishize muri Zanzibar dufite izi nzego, ariko ubuyobozi dufite burimo kuzifasha kwiyubaka no kongera ubushobozi, hamwe n’ubunararibonye dukura ahandi nko mu Rwanda, dufite icyizere cyo kuzagira inzego zikora neza natwe.”

Izi ntumwa zari zigizwe na Rashid Said Seleman ushinzwe iperereza muri kiriya kigo na Zainab Khamis ushinzwe igenamigambi muri kiriya kigo, ziherekejwe n’abakozi bo ku Rwego rw’Umuvunyi.