Kinyarwanda
English
Itsinda ry’intumwa 2 zaturutse mu kigo cy’igihugu gishinzwe kurwanya ruswa muri Congo Brazaville, kuri uyu wa kabiri tariki ya 4 Ugushyingo zasuye Polisi y’u Rwanda zisobanurirwa ingamba Polisi y’u Rwanda yashyizeho ku kurwanya ruswa n’ihohoterwa rishingiye ku gitsina.
Izi ntumwa ziyobowe n’umwe mu bayobozi b’ikigo cy’igihugu gishinzwe kurwanya ruswa muri Congo Brazaville Dr. Bernard Tchikaya, zikigera ku cyicaro gikuru cya Polisi y’u Rwanda ku Kacyiru, zakiriwe n’Umuvugizi wa Polisi y’u Rwanda n’abandi bapolisi bakuru, zisobanurirwa ingamba Polisi y’u Rwanda yashyizeho mu kurwanya ruswa n’ihohoterwa rishingiye ku gitsina muri Polisi y’u Rwanda no mu gihugu muri rusange.
Basobanuriwe ko mu ngamba Polisi y’u Rwanda yashyizeho harimo gushyiraho ishami rishinzwe kurwanya ihohoterwa rishingiye ku gitsina muri Polisi y’u Rwanda, igashyiraho ikigo ikigo Isange One Stop Centre giha ubufasha ku buntu uwakorerwa ihohoterwa rikaba rinakorera mu turere twose tw’igihugu, mu kurwanya ruswa ikaba yarashyizeho uburyo abashaka impushya zo gutwara ibinyabiziga babikora hifashishijwe ikoranabuhanga, gukora ubugenzuzi bw’imari kuri buri muyobozi wese, gushyiraho ikigo cy’amahugurwa cya Polisi (Ethic Centre), n’izindi ngamba.
Ikigo cy’amahugurwa cya Polisi (Ethic Centre) cyashyizweho mu 2012 kikaba gihugura abapolisi ku gukora akazi kabo kinyamwuga, ku ndangagaciro zikwiye kuranga umupolisi n’abandi bakozi baba aba Leta cyangwa abikorera, kikaba gihugura abantu bagera kuri 300 buri mwaka.
Mu ijambo ry’uyoboye izi ntumwa Dr. Tchikaya yagize ati:” Twaje hano kwigira ku Rwanda kubera ibyo rumaze kugeraho. Polisi y’u Rwanda iri mu za mbere zabashije kurwanya ruswa ndetse ikaba ari iya mbere muri Afurika muri Polisi zizewe n’abaturage. Ibi byose ni ibyo dushobora kuyigiraho”.
Yakomeje agira ati:”Twashimishijwe n’uko Polisi y’u Rwanda ifatanya n’izindi nzego mu kurwanya ruswa, ndetse n’ingamba zashyizweho mu kuyikumira ndetse no gukumira ihohoterwa rishingiye ku gitsina, ibi byose ni ibyo dukwiye kwigira ku Rwanda.
