Kinyarwanda
English
Kuwa kabiri tariki ya 27 Gashyantare, inteko z’abaturage mu turere twa Bugesera na Kirehe zarateranye, abazitabiriye baganira ku ngamba zafatwa ngo bakomeze kwicungira umutekano, barushaho gukumira no kurwanya ibyaha aho batuye.
Ku bigendanye n’imibereho myiza y’abaturage, baganiriye uko bafatanya gukumira no kurwanya ibiyobyabwenge, kwita ku isuku n’isukura, gutanga ubwisungane mu kwivuza, kwirinda no gukemura amakimbirane yo mu ngo, kwirinda ko abana bata amashuri, ababyeyi kwita ku bana babo no kubigisha indangagaciro n’umuco nyarwanda.
Muri utu turere twombi, izi nteko z’abaturage zikaba zaritabiriwe n’abayobozi mu nzego z’ibanze, abayobozi muri Polisi no mu zindi nzego z’umutekano.
Muri Kirehe, ku bibazo 64 bishingiye ku makimbirane yo mu ngo byatanzwe n’abaturage, 55 byarakemuwe, imiryango yari ibanye nabi irungwa yongera kubana neza.
Ku kibazo cy’abana bata amashuri cyangwa ababyeyi batohereza abana babo ku ishuri, inteko rusange yemeje ko hakorwa urutonde rw’abayeyi bafite abana batiga ndetse n’ababashora mu mirimo ivunanye.
Mu karere ka Bugesera abaturage b’umurenge wa Juru nabo bafatiye hamwe ingamba zo kwicungira umutekano no kwiteza imbere.
Umuyobozi w’Akarere wungirije ushinzwe imibereho myiza y’abaturage Uwiragiye Pricilla yasabye abaturage gufata iya mbere mu kwicungira umutekano no kugira uruhare mu ishyirwa mu bikorwa rya gahunda za Leta zigamije guteza imbere abaturage.
Yaravuze ati:”Muharanire gutangira amakuru ku gihe, kwitabira umuganda, mutungire agatoki inzego zibishinzwe abayobozi batabakira neza cyangwa babaka ruswa, kuko bigaragaza abayobozi badakunda igihugu cyabo, kandi bikagiheshja isura mbi mu ruhando mpuzamahanga ndetse bikadindiza iterambere ryacyo n’iry’abaturage.”
Yabasabye kandi gufatana urunana bakarwanyiriza hamwe ibiyobyabwenge na ruswa.
Yasoje abasaba gufatanya n’inzego z’ibanze n’iz’umutekano bagakemurira hamwe ibibazo by’abaturage baharanira guhabwa serivisi nziza, umuyobozi utabikoze ntibamuhishire.
