POLISI Y'U RWANDA

Ku itariki 8 z’uku Kwezi, Abanyamakuru b’Ibitangazamakuru bakorera mu Ntara y’i Burasirazuba baganiriye n’Ubuyobozi bwayo na Polisi y’u Rwanda ku bufatanye mu  gukangurira umuryango nyarwanda kwirinda ibyaha.

Icyo kiganiro nyunguranabitekerezo ku mikoranire  y'izo nzego cyayobowe n'Umuyobozi w'iyi Ntara, Judith Kazayire. Cyabereye ku Biro by'iyi Ntara  biri mu karere ka Rwamagana.

Mu bakitabiriye harimo Umuvugizi wa Polisi y’u Rwanda,  Assistant Commissioner of Police (ACP) Theos Badege, Umunyamabanga  Nshingwabikorwa w’Urwego rw'Abanyamakuru bigenzura (RMC) Emmanuel Mugisha, Kajangana Jean Aimé wari uhagarariye Urwego rw'Umuvunyi, Jean Bosco  Rushingabigwi uturuka mu Ishyirahamwe ry’uturere n’Umujyi wa Kigali (RALGA), n'Umuyobozi wa Polisi muri iyi Ntara, ACP Dismas Rutaganira.

Mu ijambo rye, Umuyobozi w'iyi Ntara yavuze ko imikoranire myiza y’Itangazamakuru n’inzego z’ibanze ari ingenzi mu gutuma habaho imiyoborere myiza igamije iterambere rirambye ry’igihugu n’abagituye.

Yagize ati,"Itangazamakuru ryiza rishyira imbere inyungu z’abaturage. Ryita ku bibahuza  n’ibituma barushaho kujijuka. Iyo rigaragaje ibitagenda neza, bigakosorwa, riba ritanze umusanzu ukomeye mu miyoborere myiza no mu iterambere ry’igihugu muri rusange; kandi na none hakenewe ubunyamwuga kugira ngo ubwo bwuzuzanye bugerweho."

ACP Badege yabwiye abari aho ko Itangazamakuru ari Umufatanyabikorwa ukomeye  mu kubumbatira no gusigasira umutekano binyuze mu  ruhare rigira mu gukangurira Abaturarwanda kwirinda ibyaha.

Yagize ati,"Gukorera ibiganiro nk’ibi mu Ntara bigamije kurushaho kwegera abafatanyabikorwa bacu kugira ngo turusheho gufatanya gukangurira umuryango nyarwanda kwirinda ibyaha no kuwushishikariza kwitabira ibikorwa by’iterambere."

Yagarutse ku buryo Polisi imenyekanisha ibyo ishinzwe n’ibyo ikora; aha akaba yaravuze ko mu byo ikoresha harimo Urubuga rwayo rwa Murandasi n’Imbuga nkoranyambaga nkaTwitter na Facebook; kandi ko yashyizeho imirongo ya telefone itishyurwa itangirwaho amakuru.

Yagize kandi ati,"Polisi irinda ahabereye icyaha, kandi igakusanya amakuru y’ibimenyetso byacyo; mu gihe ku rundi ruhande Itangazamakuru riba  rishaka amakuru yo kumenyesha abaturage. Izo nzego zuhuriye aho hantu zisabwa gukorana neza  kugira ngo  hatagira urubangamira urundi; ariko na none ibyo bigakorwa hashingiwe ku mategeko agenga buri ruhande."

Mugisha yibukije abakora uyu Mwuga (Itangazamakuru) ko igihe cyose bari mu kazi bagomba kwambara Ikarita y’akazi ibaranga itangwa n’Urwego abereye Umunyamabanga; kandi bakirinda kuyikoresha mu buryo bunyuranije n’amategeko.

Kajangana yagarutse ku burenganzira bw’Abanyamakuru bwo kubona amakuru, ndetse  n’Amakuru batemerewe guhabwa, nk’uko biteganywa  n’Itegeko N° 04/2013 ryo ku wa 08/02/2013 ryerekeye kuyabona, aho ingingo yaryo ya 4 ivuga ko mu makuru Umunyamakuru atemerewe guhabwa cyangwa kubona harimo amakuru ashobora guhungabanya umutekano w’Igihugu, kubangamira iyubahirizwa ry’amategeko cyangwa ubutabera, gutera ukwivanga mu buzima bwite bw’umuntu bitari mu nyungu rusange, kubangamira ukurindwa kw’amabanga y’ubucuruzi cyangwa ubundi burenganzira bw’umutungo mu by’ubwenge kwemewe n’amategeko no  kubangamira mu ikurikiranwa n’ubutabera k’ubuyobozi bw’urwego rwa Leta cyangwa igihe riteganyijwe.

Mu kiganiro yatanze,  Rushingabigwi yabwiye abitabiriye iyo nama nyunguranabitekerezo ko hari intambwe imaze guterwa mu mikoranire y’Itangazamakuru n’inzego z’ibanze.

Yagize ati, "Imikoranire y’Itangazamakuru n’inzego z’ibanze igomba gushingira no kuganisha ku giteza imbere umuturage. Iyo ni yo myumvire ikwiriye kwimakazwa."

Abanyamakuru babajije ibibazo bishingiye ahanini  ku mikoranire hagati yabo na Polisi ndetse n’inzego z’ibanze bahabwa ibisubizo.