Kinyarwanda
English
Kuri uyu wa Gatandatu tariki ya 16 Ugushyingo 2024, Polisi y'u Rwanda yagiranye ibiganiro n'abanyamakuru bakorera ibitangazamakuru bitandukanye byo mu Ntara y'Amajyaruguru.
Ni ibiganiro byateguwe n'Ishami rya Polisi y'u Rwanda rishinzwe inozabubanyi n'itangazamakuru (PRM) bigamije kurebera hamwe n'abanyamakuru bakorera hirya no hino mu gihugu, uko umutekano wifashe no kunoza ubufatanye mu gukumira no kurwanya ibyaha.
Kuva muri Kanama kugeza mu kwezi k'Ukwakira, muri uyu mwaka wa 2024, mu Ntara y'Amajyaruguru yonyine, abantu 339 bafatiwe mu bucuruzi bwa magendu, barimo 239 bo mu Karere ka Burera.
Muri icyo gihe kandi, hafashwe abagera kuri 214 bakurikiranyweho gucuruza ibiyobyabwenge, 146 bafatiwe mu bujura, 85 bakurikiranyweho icyaha cyo gukubita cyangwa gukomeretsa, abacyekwaho gusambanya abana 32 na 16 bafashwe bacukura amabuye y'agaciro mu buryo bunyuranyije n'amategeko.
Umuvugizi wa Polisi y'u Rwanda, Assistant Commissioner of Police (ACP) Boniface Rutikanga yavuze ko Polisi n'itangazamakuru bari maso kandi ko biteguye gukumira, gushyira ku karubanda no kurwanya ibihungabanya umutekano.
Yagize ati:" Polisi y'u Rwanda n'itangazamakuru barahari igihe cyose kandi n'ubwo hariho ubufatanye mu gutangaza amakuru, ikigamijwe ni uko agera kure hashoboka, abanyarwanda bakayamenya kugira ngo habeho ubufatanye mu kwiyubakira u Rwanda twifuza ruzira icyaha.
Umuvugizi wa Polisi y'u Rwanda yongeyeho ko amarembo afunguye ku banyamakuru bose, mu rwego rwo kubagezaho amakuru bakeneye kandi ku gihe bayakenereye.
Ati: " Polisi y'u Rwanda ikoresha imbuga zitandukanye, zirimo; X, YouTube, Tiktok, Instagram, Facebook na website; mu rwego rwo gusakaza amakuru.
Birabujijwe gutangaza amakuru y'ibihuha, icyizere abaturage bagirira Polisi n'itangazamakuru gishingiye ku kuri n'ubunyamwuga batubonaho.
Yashimangiye kandi ko iyo nta mutekano uhari, buri wese bimugiraho ingaruka, ari na yo mpamvu uruhare rwa buri umwe rukenewe mu kuwusigasira.
Yabashishikarije guhora barwanya ibihungabanya umutekano n'iterambere by'abaturage birimo; ibiyobyabwenge, ihohoterwa rishingiye ku gitsina n'irikorerwa abana, magendu n'ubusinzi cyane cyane mu rubyiruko.
