POLISI Y'U RWANDA

Aya akurikira ni amakuru y'ingezi Polisi y'u Rwanda yatangaje ku rubuga rwayo rwa murandasi  (www.police.gov.rw) mu cyumweru gishize yatumye Abaturarwanda bamenya ibikorwa yakoze mu minsi irindwi ishize :

Polisi y’u Rwanda n’iya Tanzaniya barebeye hamwe uko umutekano wifashe mu gishanga cy’Akagera

Mu rwego rwo gukomeza kurwanya ibyaha ndengamipaka cyane cyane iyinjizwa n’icuruzwa ry’ibiyobyabwenge hifashishijwe inzira z’amazi n’imipaka itemewe, kuri uyu wa kabiri tariki ya 20 Werurwe, Polisi y’u Rwanda n’iya Tanzaniya bahuriye hamwe bakorana umukwabu wo kureba uko umutekno wifashe ku mipaka y’ibihugu byombi, cyane cyane mu gishanga cy’Akagera ibi bihugu bihuriraho.

Iki gikorwa kikaba kiri muri gahunda yo gushyira mu bikorwa imwe mu myanzuro y’amasezerano y’imikoranire Polisi z’ibihugu byombi zashyizeho umukono mu mwaka wa 2012. Muri uyu mukwabu, Polisi y’u Rwanda ikaba yari ihagarariwe n’Umuyobozi w’ishami rya Polisi rishinwe umutekano wo mu mazi Assistant Commissioner of Police (ACP) Reverien Rugwizangonga. Soma ibindi.

Huye: Isange One Stop Center yo mu bitaro bya Kabutare yakanguriye abanyeshuri kwirinda inda zititeguwe

Mu rwego rwo gufasha urubyiruko kumenya no kwita ku buzima bwabo kubera ko inda zitateguwe ari zimwe mu nzitizi zikomeye zibuza abanyeshuri kugera ku ntego baba bafite bajya mu mashuri, Polisi y’u Rwanda ikorera mu karere ka Huye ifatanyije n’Ikigo Isange One Stop Center gikorera mu Bitaro bya Kabutare, kuri uyu wa 20 Werurwe 2018, baganiriye n’abanyeshuri 215 bo mu Ishuri ryisumbuye (Ecole secondaire) rya Butare riherereye mu mudugudu wa Butare Umurenge wa Ngoma.

Ushinzwe imikoranire ya Polisi n’abaturage ndetse n’izindi nzego mu karere ka Ruhango, Chief Inspector of Police (CIP) muri ako Karere, Chief Inspector of Police (CIP) Rose Ndikumana yasabye abo banyeshuri kwirinda ibiyobyabwenge, kuko usanga ahanini aribyo bitera ababikoresha kwishora mu zindi ngeso mbi zirimo, ubusambanyi, kureka ishuri no gutwara inda zitateganyijwe. Soma ibindi.

Musanze: Abapolisi bateye ibiti mu rwego rwo kurengera ibidukikije

Ku itariki ya 21 Werurwe, abapolisi bakorera mu karere ka Musanze bakoze umuganda wo gutera ibiti mu murenge wa Muhoza, akagari ka Kigombe mu mudugudu wa Nduruma byo mu bwoko bwa Greveria bigera kuri 500.

Umuyobozi wa Polisi y’u Rwanda mu karere ka Musanze, Superintendent of Police (SP) Aphrodice Gashumba, yavuze ko iki gikorwa bagiteguye muri gahunda yabo basanganwe yo gufata neza no kurengera ibidukikije. Yagize ati,"Iyi ni gahunda dusanzwe dufite yo kurengera ibidukikije, kubirinda no kubifata neza ; aho tunafatanya n’izindi nzego zirimo iz’ibanze muri aka karere, abatwara ibinyabiziga n’izindi nzego. Duhurira kandi mu bikorwa by’isuku n’isukura, no gutera ibiti mu mirima y’abaturage, guca imirwanyasuri n’amaterasi n’ibindi. Soma ibindi." Soma ibindi.

Musanze: Habereye ubukangurambaga ku kwirinda ibiyobyabwenge bwakurikiwe no kumena inzoga zitemewe mu Rwanda zahafatiwe

Ku wa kabiri tariki 20 Werurwe uyu mwaka mu karere ka Musanze habereye ubukangurambaga ku kwirinda kwishora mu biyobyabwenge bwakurikiwe n’igikorwa cyo kumena inzoga zitemewe mu Rwanda zafatiwe muri aka karere mu byumweru bibiri bishize ku bufatanye bwa Polisi n’izindi nzego.

Inzoga zamenwe zigizwe n’amaduzeni 533 ya Blue Sky, amaduzeni 82 ya Chase Vodka, amaduzeni 17 ya Host Waragi, amaduzeni 6 ya Kitoko, amaduzeni 3 ya Empire n’amasashi 38 y’iyitwa Beat. Soma ibindi.

ACP Kajeguhakwa yasabye urubyiruko rw’Abakorerabushake mu gukumira ibyaha kuba umusemburo w’iterambere n’umutekano birambye

Umuyobozi wa Polisi mu Ntara y’Amajyepfo, Assistant Commissioner of Police (ACP) Jean Claude Kajeguhakwa yasabye Abahuzabikorwa b’Urubyiruko rw’Abakorerabushake mu gukumira ibyaha ku rwego rw’uturere tugize iyi Ntara kuba umusemburo w’iterambere n’umutekano birambye.

Ibi yabibabwiye ku wa mbere tariki 19 Werurwe uyu mwaka mu kiganiro yagiranye na bo cyari kigamije kubakangurira kuzirikana no kwita ku nshingano zabo z’ubufatanye mu gukumira ibyaha. Soma ibindi.

Kamonyi: Polisi yafashe umugabo atwaye imyama mu modoka mu buryo butubahirije amategeko

Polisi mu karere ka Kirehe; ku wa kane tariki 22 Werurwe uyu mwaka yafashe umugabo upakiye ibiro 200 by’inyama z’inka mu mudoka mu buryo butubahirije amategeko azivanye mu murenge wa Kayenzi (muri aka karere) azijyanye mu Mujyi wa Kigali.

Uwo mugabo yafatiwe mu kagari ka Muganza (Kayenzi) ahagana saa yine z’igitondo cy’uwo munsi.

Amabwiriza avuga ko umuntu ushaka gutwara inyama ahantu runaka akoresheje imodoka agomba kuzishyira mu cyuma cyabugenewe gikonjesha (Refrigerator); hanyuma akagitereka mu modoka. Soma ibindi.

Ngororero: Polisi yataye muri yombi abagabo babiri bibye umuriro w’amashanyarazi

Ku itariki 21 Werurwe uyu mwaka ,Polisi y’u Rwanda mu Karere ka Ngororero yafashe abagabo  babiri ari bo : Munezero Eric na Nshimiyimana Theogene bakekwaho kwiba umuriro w’amashanyarazi bakoresheje Mubazi y’amashanyarazi.

Aba bagabo bombi bafungiye kuri Sitasiyo ya Polisi ya Kabaya mu gihe iperereza rikomeje. Umuvugizi wa Polisi mu Ntara y’Uburengerazuba, Chief Inspector of Police (CIP) Innocent Gasasira yavuze ko Munezero w’imyaka 24 y’amavuko na Nshimiyimana  ufite imyaka 29 y’amavuko bafashwe kubera amakuru bahawe n’Ikigo gishinzwe gukwirakwiza ingufu z’amashanyarazi (Energy Utility Corporation Limited). Soma ibindi.

Muri Rubavu na Musanze  Polisi  yahafatiye amaduzeni  asaga 500 y’inzoga zitemewe mu Rwanda

Ku itariki 21 z’uku kwezi Polisi mu turere twa Burera na Musanze yafashe amaduzeni 566 y’inzoga zitemewe mu Rwanda; abazinjije mu gihugu bakaba barazikuye muri bimwe mu bihugu bihana imbibi n’u Rwanda.

Amaduzeni 420 ya Chief Waragi yafatanywe uwitwa Kaddafi Hassan ayapakiye mu modoka y’Ivatiri ifite nimero za pulake UAY 506 P. Yafatiwe mu kagari ka Rwasa, umurenge wa Gahunga, mu karere ka Burera. Soma ibindi.

Rulindo: Polisi yigishije abanyeshuri uko bakwiriye kugenda mu muhanda

Ku itariki ya 21 Werurwe, Polisi y’u Rwanda mu karere ka Rulindo yaganirije abanyeshuri barererwa mu bigo by’amashuri byegereye umuhanda Kigali-Musanze byo mu mirenge 3 harimo ishuri ribanza rya Nyakambu ryo mu murenge wa Ntarabana, ikigo cya Trust Mountain  Academy cyo mu murenge wa Shyorongi, n’abo mu ishuri ribanza rya Rulindo riherereye mu mu murenge wa Bushoki, basobanurirwa amategeko y’umuhanda n’uko bagomba kuwugendamo neza mu gihe  bajya cyangwa bava ku ishuri hagamijwe kwirinda impanuka.

Ibiganiro byahuje Polisi n’abanyeshuri b’ibi bigo bikaba byarabereye aho abanyeshuri bakunze kwambukira umuhanda. Soma ibindi.