Kinyarwanda
English
KIGALI: Hateraniye inama ihuza Abapolisikazi ku nshuro ya 14
Inama ngarukamwaka ihuza Abapolisikazi bakorera muri Polisi y’u Rwanda mu mashami atandukanye yongeye guterana ku nshuro ya 14, ku cyicaro gikuru cya Polisi ku Kacyiru, ku wa Kabiri tariki ya 23 Kamena 2026.
Ni inama yabaye iminsi ibiri, ihuriza hamwe abayobozi bakuru ba Polisi y’u Rwanda, abayobozi muri guverinoma, abapolisikazi n’abandi bafatanyabikorwa, hagamijwe kurebera hamwe ibimaze kugerwaho n'abapolisikazi, imbogamizi bahura na zo mu kazi ka buri munsi n’ingamba zo kurushaho guteza imbere ihame ry’uburinganire n’ubwuzuzanye muri Polisi y’u Rwanda bijyanye no kuzuza neza inshingano zabo za buri munsi. Inkuru Irambuye...
Polisi irasaba abatwara ibinyabiziga n’abagenzi muri rusange korohereza abanyeshuri mu gihe bajya mu biruhuko
Kuva ku wa Mbere tariki ya 29 Kamena kugeza tariki ya 02 Nyakanga, nk’uko ingengabihe y’umwaka w’amashuri wa 2025/2026 yatangajwe na Minisiteri y’Uburezi n'Ikigo cy'igihugu gishinzwe Ibizamini n'Ubugenzuzi bw'Amashuri (NESA), igaragaza ko ikiruhuko cy’igihembwe cya gatatu gisoza umwaka, ku banyeshuri biga bacumbikiwe mu mashuri abanza n’ayisumbuye bazatangira gusubira mu miryango yabo mu ibiruhuko.
Polisi y’u Rwanda iboneyeho gusaba ibigo by’amashuri, ibigo bitwara abagenzi mu buryo bwa rusange, abagenzi n’izindi nzego zitandukanye zifite aho zihuriye n’ingendo z’abanyeshuri bava ku mashuri basubira mu miryango yabo, kuborohereza kugira ngo ntihabeho ubukererwe n’izindi mbogamizi zabadindiza mu rugendo rwabo. Inkuru Irambuye...
Inama ihuza Abapolisikazi ku nshuro ya 14 yasojwe basabwa gukoresha neza ubushobozi n’amahirwe bahabwa mu kazi
Ku wa Gatatu tariki 24 Kamena 2026, Abapolisikazi bakorera mu mashami atandukanye ya Polisi y’u Rwanda, basoje inama bari bamazemo iminsi ibiri, yibanze ku bijyanye n’imyitwarire myiza mu kazi n’indangagaciro z’ubunyamwuga mu gipolisi zirimo; ubunyangamugayo, ubutabera, ubwitange n’umurava, yagarutse kandi ku ruhare rukomeye rw’umugore mu kubaka umuryango utekanye kandi ushoboye guhangana n’ibibazo no gufata ibyemezo.
Banaganiriye kubijyanye no kwigirira icyizere mu bushobozi bwabo no kuba abanyamwuga bashoboye kandi baharanira gukora neza kurushaho, kubyaza umusaruro amahirwe bafite no kongera ubumenyi mu kuyobora, gukurikirana imyitwarire y’abo bashinzwe kuyobora, kugira inyota yo gukora ubushakashatsi mu gushakira ibisubizo bishya by’umutekano muri iki gihe, kuba abajyanama n’intangarugero bayobora kandi bagatera ishyaka ibisekuru bizaza, kuba intwari mu gukorera no kurinda abaturage, kuba abahagarariye neza Polisi y’u Rwanda n’Igihugu muri rusange. Inkuru Irambuye...
Ba Ofisiye bato barenga 200 bari mu mahugurwa bakoze urugendoshuri
Abapolisi n'abo mu zindi nzego zishinzwe iyubahirizwa ry'amategeko bagera kuri 206 bo mu rwego rwa ba ofisiye bato bari mu mahugurwa mu Kigo cya Polisi gitangirwamo amahugurwa yo Kurwanya iterabwoba (Counter Terrorism Center-CTTC) giherereye i Mayange mu Karere ka Bugesera, ku wa Kane tariki ya 25 Kamena, bakoze urugendoshuri mu mujyi wa Kigali.
Intego y’uru rugendoshuri igamije kubafasha guhuza amasomo bigira muri ayo mahugurwa ajyanye n’Ubuyobozi bwa Sitasiyo (PSCC) n'ibikorerwa mu kazi ka buri munsi. Inkuru Irambuye...
Abapolisi b’u Rwanda babiri basoje amahugurwa muri Singapore
Ku wa 26 Kamena, Abapolisi b’u Rwanda babiri; Assistant Inspector of Police (AIP) Laurance Manzi na AIP Emmanuel Rusingizandekwe, basoje amasomo abagira ba Ofisiye mu Ishuri ry’amahugurwa y’ibanze ya ba Ofisiye mu gihugu cya Singapore.
Ni amahugurwa y'icyiciro cya 25 yari amaze amezi icyenda (9), umuhango wo kuyasoza wayobowe n’Umuyobozi Mukuru wungirije wa Polisi ya Singapore ushinzwe ibikorwa; DCP Alvin Moh, ukaba wanitabiriwe na Ambasaderi w’u Rwanda muri icyo gihugu; Innocent Bagamba Muhizi na Komiseri ushinzwe amasomo mu Ishuri rikuru rya Polisi y’u Rwanda; Assistant Commissioner of Police (ACP) Augustin Ntaganira. Inkuru Irambuye...
